Հայկ Խանումյան«Եթե Ռուսաստանը չի ամրանում այստեղ, ուրեմն ամրապնդվելու է Թուրքիան: Ի՞նչ է, դուք ուզում եք՝ Թուրքիա՞ն ամրապնդվի, թե՞ մոռացել եք 1915 թ-ը ... Ռուսաստանը, այո՛, պիտի ամրապնդվի, և ուրիշ ձև չկա...». «Գալա»-ի հետ հարցազրույցում նման հայտարարություն է արել ԼՂՀ նախագահի խոսնակ Դավիթ Բաբայանը: Նախագահի խոսնակը ի պաշտոնե արտահայտում է նախագահի կարծիքը:
Ողջունելով օտար տերության ամրապնդվելը տարածաշրջանում, հիանալով Հայաստանի ինքնիշխանության սահմանափակումից՝ զարմանալիորեն Արցախի բարձրագույն իշխանությունը թաքուն երազանք ունի դառնալու մեծ տերության սուբյեկտ, որտեղ իրենց վերապահված կլինի վերակացուի դեր: Մոտովորապես այնպես, ինչպես Չեչնիայում: Չէ՞ որ Երևանից եկող գումարներն արդեն չեն հերիքում, հարկավոր են ավելի շատ գումարներ: Ո՞ւմ է պետք ինքնիշխանությունը, Սահմանադրությունը, որը նույնիսկ սահմանափակում է իշխանությանը կառչած լինելու ժամանակահատվածը: Պատվիրակիր ինքնիշխանությունդ մի խոշոր տերության (բնականաբար Ռուսաստանին, հո չե՞ք ուզում, որ թուրքերը գան մեզ ցեղասպանության ենթարկեն), նրանից տարեկան ստացիր հսկայական գումարներ, հարազատներիդ պատկանող կազմակերպություններից գնիր ծառայողական մեքենաներ, բացիր սրճարան, տաքսի ծառայություն, կառուցիր մեծ դղյակ, մսի շուկան դարձրու քո մենաշնորհը, շինարարական պատվերների մեծ մասն ինքդ կատարիր, ի վերջո, ունեցի՛ր քո սեփական պահեստապետերը:
Իսկ գուցե և ամեն ինչ շատ ավելի հստակ է: Գուցե Արցախում իշխանության է եկել օտարերկրյա գործակալների թիմը: Չէ՞ որ վերջիններս հանդես են գալիս միայն այդ օտար երկրի շահերի տեսանկյունից: Նույնիսկ այդ դեպքում, երբ այս նույն օտար երկիրը զանգվածային ոչնչացման զենք է վաճառում մեր թշնամուն:
Փաստը, որ երկիրը կառավարում են ոչ կոմպետենտ մարդիկ, ակնառու է: Դրա համար էլ իրենց անհարմար են զգում․․․ ու ողջունում այլ տերությունների մուտքը իրենց երկիր: Որովհետև իրենք միայն ենթակա կարող են լինել: Ցանկալի է նրա ենթական, ով իրենց անձնական երաշխիքներ և պահածո կտա: Որովհետև իրենք պահեստապետ էլ մնացել են:
Իսկ գուցե մեղքը մե՞րն է, որ թողեցինք երկիրը պահեստ դարձնեն…
Պատմություններ
