Civilnet
Սահմանային կրակոցները միշտ եղել են, իսկ այս ակտիվությունը ես կապում եմ նաև Սոչիում օգոստոսի 8,9-ին Հայաստանի և Ադրբեջանի նախագահների և Ռուսաստանի նախագահի կայանալիք հանդիպման հետ. օգոստոսի 6-ին Լոռու մարզ կատարած աշխատանքային այցի ընթացքում այսպիսի հայտարարություն է արել վարչապետ Հովիկ Աբրահամյանը` պատասխանելով լրագրողներին հետաքրքրող մի շարք հարցերի:
«Այս միջադեպերը ևս մեկ անգամ ցույց տվեցին, որ Ադրբեջանի իշխանությունները պետք է հասկանան, որ իրենք այսօր հնարավորություն չունեն, որպեսզի Արցախի և Հայաստանի բանակներին ձեռնոց նետեն: Յուրաքանչյուր զինվորի կորուստ մեծ կորուստ է բոլորիս համար, և մեր ցանկությունն է, որպեսզի ԼՂ հակամարտությունը լուծվի խաղաղ բանակցությունների արդյունքում»,- ասել է վարչապետը:
Նա նշել է, որ դիրքերից սկսած` բոլորը մարտական են տրամադրված և պատրաստ են պաշտպանելու երկրի սահմանները: «Կառավարությունն ուշադիր է եղել և այսուհետ առավել ուշադիր է լինելու սահմանամերձ գյուղերի բոլոր խնդիրների նկատմամբ` փորձելով հնարավորության սահմանում դրանց լուծում տալ: Որպեսզի բնակիչները չլքեն սահմանամերձ գյուղերը, պետք է աշխատանք ունենան: Մենք այժմ օրենքի նախագիծ ենք պատրաստում և սեպտեմբերին կներկայացնենք Ազգային ժողով, որ սահմանամերձ 30 համայնքում գործարարությամբ զբաղվողներն ազատվեն բոլոր հարկերից»,- ասել է Հովիկ Աբրահամյանը:
Գործադիրի ղեկավարն անդրադարձել է նաև բարերար Լևոն Հայրապետյանի կալանավորմանը:
«Լևոն Հայրապետյանը մշտապես օգնել է Արցախի զարգացման բոլոր ծրագրերի իրականացմանը, միշտ եղել է արցախցու կողքին: Մենք բարձր ենք գնահատում նրա բարեգործությունը և փորձելու ենք մեր լիազորությունների շրջանակում օգնել նրան որպես մեր ազգի բարերար»,- ասել է վարչապետը:
Պատմություններ
