Չինարիի բնակիչը գերի է ընկել Ադրբեջանում

Տավուշի մարզի Չինարի գյուղի բնակիչ, 1981թ. ծնված Կարեն Պետրոսյանը օգոստոսի 7-ին` ժամը 12:00-ի սահմաններում, մոլորվելով հատել է հայ-ադրբեջանական պետական սահմանը: Այս մասին ՍիվիլՆեթին տեղեկացրեց Չինարիի գյուղապետ Սամվել Սաղոյանը:

Նա նշեց, որ դեպքի մասին արդեն հայտնել են պաշտպանության նախարարությանը և Կարմիր խաչի միջազգային կոմիտեի հայաստանյան պատվիրակությանը:

Վերջին մի քանի օրերին հայ-ադրբեջանական շփման գծի ամբողջ երկայնքով իրավիճակը կտրուկ սրվել է։ Հակառակորդը դիվերսիոն ներթափանցման փորձեր է ձեռնարկել ռազմաճակատի տարբեր հատվածներում, ինչը բոլոր դեպքերում կասեցվել է: Սաստկացել է նաև Տավուշի մարզի սահմանամերձ գյուղերի գնդակոծությունը ադրբեջանական կողմից։

Շփման գծում տիրող լարված իրավիճակի կապակցությամբ ավելի վաղ իրենց մտահոգությունն էին հայտնել ԵԱՀԿ-ն, Ռուսաստանը, ԱՄՆ-ը, Ֆրանսիան, Մեծ Բրիտանիան,Եվրամիությունը, ՄԱԿ-ը։