Civilnet
Փոխարտգորխնախարար Շավարշ Քոչարյանը մեկնաբանել է Ադրբեջանի նախագահ Իլհամ Ալիևի թվիթերյան վերջին հայտարարությունները:
«Իր դեստրուկտիվ քաղաքականությամբ խաթարելով բանակցային գործընթացը, գործելով ի հակառակ իր իսկ կողմից ստորագրված փաստաթղթերի և ձեռք բերված պայմանավորվածությունների, քարանձավային մտածելակերպի վրա հիմնված ռասիստական հայտարարություններով, միջազգային ասպարեզում երկիրը դարձնելով ծաղկած կոռուպցիայի և ավտորիտարիզմի հոմանիշ, և բոլորովին վերջերս, իր իսկ կողմից նախապես ծրագրավորված սադրանքների արդյունքում անհաջողության մատնվելով մարտական գործողություններում, Ադրբեջանի ղեկավարը անհաջող փորձում է սուր ճոճել սոցիալական ցանցերում, որտեղ ևս արժանի հակահարված է ստանում»,- ասված է Շավարշ Քոչարյանի մեկնաբանությունում, որը տարածել է արտգործնախարարության մամուլի ծառայությունը:
Փոխարտգործնախարարի խոսքով` Իլհամ Ալիևն իր վրեժը լուծում է իր ժողովրդից՝ «էլ ավելի խստացնելով խոսքի ազատության սահմանափակումները, բռնաճնշումները քաղաքացիական ակտիվիստների դեմ»։
«Նա շարունակում է ցինիկաբար հերոսացնել քնած մարդուն սպանողին, տանջամահ անել մոլորված գյուղացիներին։ Այսպիսի մթնոլորտում են ձևավորվել պատմության մեջ ամենատխրահռչակ բռնակալները՝ հայտնի բոլոր հետևանքներով հանդերձ: Միջազգային հանրությանը դեռ ուշ չէ նրան կանգնեցնել և իրականության դաշտ հետ բերել։ Մենք պատրաստ ենք ոչ միայն խաղաղություն պարտադրել մեր սանձարձակ հարևանին, այլև շարունակելու ենք ակտիվ մասնակցություն ունենալ նրան իրականության դաշտ հետ բերելու գործում»,- հայտարարել է Շավարշ Քոչարյանը։
Վերջին շաբաթվա ընթացքում շփման գծում տիրող լարված իրավիճակի ֆոնին Ադրբեջանի նախագահն օգոստոսի 7-ին Թվիթերի իր էջում բռնության կոչ պարունակող գրառումներ է կատարել Հայաստանի հասցեին` չբացառելով պատերազմի երկրորդ փուլը: Նա հայերին անվանել էր «բարբարոսներ», «վանդալներ»: Ալիևի այս գրառումները մեծամասամբ ստացել էին հակաադրբեջանական արձագանքներ:
Պատմություններ
