Պոլսի եկեղեցիներում ապրիլի 24-ին չի հնչի «ցեղասպանություն» բառը

Պոլսի Հայոց պատրիարքի տեղապահ Արամ արքեպիսկոպոս Աթեշյան Կ. Պոլսի հայոց պատրիարքարանը ապրիլի 24-ին «1915 թվականին մահացածների համար» պատարագ է մատուցելու: Այդ մասին ծանուցում է թուրքական Hürriyet թերթը: Սուրբ Աստվածածին եկեղեցում տեղի ունենալիք պատարագը մատուցելու է Կ. Պոլսի Հայոց պատրիարքի տեղապահ Արամ արքեպիսկոպոս Աթեշյանը: Ավելի վաղ ստացված տեղեկության համաձայն՝ Հայոց ցեղասպանության 100-րդ տարելիցի միջոցառումների շրջանակում ապրիլի 23-ին աշխարհի բոլոր հայկական եկեղեցիներում զանգերը ղողանջելու են 100 անգամ՝ ի հիշատակ անմեղ զոհերի: Ըստ «Ակօսի»՝ զանգեր չեն ղողանջելու միայն Պոլսում: Մայր Աթոռը, կարծես, ըմբռնումով է մոտենում այդ խնդրին: ՍիվիլՆեթի հետ զրույցում Մայր Աթոռի մամլո դիվանի պատասխանատու Տ․ Վահրամ քահանա Մելիքյանը հայտարարել է, որ ստեղծված վիճակն «իրենց համար լիովին ընկալելի է»: