Civilnet
Հռոմի պապ Ֆրանցիսկոսը մտադիր չէ պատասխանել Թուրքիային. ապրիլի 15-ին այսպիսի հայտարարություն է արել Վատիկանի խոսնակ Ֆեդերիկո Լոմբարդին, հաղորդում է կաթոլիկ նորությունների Abouna կայքը:
Ապրիլի 12-ին Հռոմի Ֆրանցիսկոս պապը Վատիկանի Սուրբ Պետրոսի տաճարում պատարագ է մատուցել՝ նվիրված Հայոց ցեղասպանության 100-րդ տարելիցին: Պատարագի ժամանակ Պապը հայտարարել է, որ Հայոց ցեղասպանությունը «20-րդ դարի առաջին ցեղասպանությունն» է: Կաթոլիկ եկեղեցու առաջնորդի այս հայտարարությունը մեծ դժգոհություն է առաջացրել Թուրքիայում: Պաշտոնական Անկարան չի բավարարվել հենց նույն օրը Թուրքիայում Վատիկանի դեսպանից բացատրութուն ստանալու համար նրան արտգործնախարարություն կանչելով: Խորհրդակցության համար հետ է կանչվել նաև Վատիկանում Թուրքիայի դեսպանը: Հռոմի պապին քննադատել է նաև Թուրքիայի նախագահ Ռեջեփ Թայիփ Էրդողանը:
Լոմբարդին տեղեկացրել է, որ Պապը մտադիր չէ պատասխանել այդ հայտարարություններին, իսկ կիրակի [ապրիլի 12] օրը հնչեցրած նրա խոսքերը միտված էին Հայաստանի և Թուրքիայի միջև երկխոսության խրախուսմանը:
«Այդ ելույթը շատ հստակ էր նրանց համար, ովքեր ցանկանում էին ընկալել դրա նշանակությունը, այն շատ հարուստ էր,- ասել է Վատիկանի խոսնակը:- Ի վերջո, այն թուրք և հայ ժողովուրդների միջև հաշտության ու երկխոսության հասնելու ցանկության մասին էր»:
Ապրիլի 12-ի հաջորդ օրը Վատիկանի Սուրբ Մարտա եկեղեցում առավոտյան պատարագի ժամանակ Հռոմի պապն անուղղակիորեն հաստատել է նախօրեին ասածը՝ նշելով, որ «եկեղեցին անկեղծության վայր է»:
«Մենք չենք կարող լռել մեր տեսածի ու լսածի մասին,- նշել է Ֆրանցիսկոս պապը:- Այսօր էլ Եկեղեցու ուղերձն է ընտրել անկեղծության ճանապարհը, քրիստոնեական խիզախության ճանապարհը»,- ասել է նա:
Պատմություններ
