Վաղուց ակնհայտ է` ժխտողականության քաղաքականությունը որևէ հեռանկար չունի. Նալբանդյան

Վաղուց ակնհայտ է, որ ժխտողականության քաղաքականությունը որևէ հեռանկար չունի. Այսպիսի հայտարարություն է արել ՀՀ արտգործնախարար Էդվարդ Նալբանդյանը` «Ազատություն» ռադիոկայանին մեկնաբանելով Թուրքիայի արձագանքը Եվրախորհրդարանի կողմից Հայոց ցեղասպանության 100-րդ տարելիցի կապակցությամբ ընդունած բանաձևին: «Դեսպաններ հետ կանչելով, կոպիտ քննադատություն հնչեցնելով երկրների, կազմակերպությունների հասցեին, որոնք հարգանքի տուրք են մատուցում Ցեղասպանության զոհ դարձած մեկուկես միլիոն անմեղ հայերի հիշատակին, իրենց ձայնն են բարձրացնում ժխտողականության դեմ, մարդկության դեմ նոր հանցագործությունների կանխարգելման օգտին, Թուրքիայի ղեկավարությունը ավելի ու ավելի միայնակ է մնում խորտակվող ժխտողականության նավի վրա։ Թուրքիան փորձում է ճնշումներ գործադրել, ես կասեի՝ շանտաժի ենթարկել միջազգային կառույցների, բազմաթիվ երկրների։ Սակայն դժվար թե այս հարցում հաջողություն ունենա, միգուցե հաջողի միայն այն երկրներում, որտեղ չեն հարգվում մարդու իրավունքները և հիմնարար ազատությունները, ուր խարխուլ է ժողովրդավարությունը։ Ի՞նչ է տալիս դեսպանների հետկանչը։ Lավ հիշում ենք, որ հետկանչից հետո ստիպված են լինում նրանց հետ վերադարձնել։ Եվրոպական 28 երկիր ներկայացնող խորհրդարանն է երեկ բանաձև ընդունել։ Լավ է, որ Անկարայում գոնե գիտակցել են՝ 28 երկրից հետ չեն կանչել դեսպաններին։ Հակառակ դեպքում թուրք դեսպանների համար գործազրկության լուրջ խնդիր կառաջանա։ Թուրքիայի իշխանությունների արձագանքը հիշեցնում է ցուգցվանգում հայտնված շախմատիստի, որի ամեն հաջորդ քայլ ավելի է բարդացնում նրա դիրքերը։ Ինչպես ասվում է Եվրախորհրդարանի բանաձևում՝ առանց ճշմարտության հնարավոր չէ հասնել հաշտեցման, և կավելացնեի՝ միջազգային հանրության հետ։ *** Եվրախորհրդարանը ապրիլի 15-ի լիագումար նիստին Հայոց ցեղասպանության 100-րդ տարելիցի կապակցությամբ ընդունել է բանաձև, որով կոչ է անում Թուրքիային առերեսվել սեփական անցյալին և ճանաչել Հայոց ցեղասպանությունը: Բանաձևը Եվրոպական Միության անդամ երկրներին, որոնք դեռ չեն ճանաչել Հայոց ցեղասպանությունը, կոչ է անում ճանաչել այն, իսկ Թուրքիային՝ Հայաստանի հետ կարգավորել հարաբերությունները: Թուրքիայի արտգործնախարարությունը Եվրախորհրդարանի ընդունած բանաձևը որակել է «անհեթեթ, հայկական քարոզչությամբ լեցուն» և Եվրոպախորհրդարանին մեղադրել է ԵՄ-Թուրքիա հարաբերություններում հերթական անգամ խոչընդոտներ ստեղծելու մեջ: