Civilnet
Բաքվի մոտ՝ Նարդարան ավանում, նոյեմբերի 26-ին Ադրբեջանի իրավապահ մարմինները հատուկ գործողություն են իրականացրել «սահմանադրական կարգը փոխել ծրագրողների դեմ», որի արդյունքում ձերբակալվել է 14 մարդ, հաղորդում է contact.az-ը:
Ադրբեջանի ներքին գործերի նախարարությունն ու գլխավոր դատախազությունը հանդես են եկել հայտարարությամբ, որում մասնավորապես ասված է. «Զինված իսլամական արմատական խմբավորումը նախապատրաստում էր սադրանքների շարք, ահաբեկչական գործողություններ և զանգվածային անկարգություններ: Խմբավորման չեզոքացման նպատակով ՆԳՆ-ն ձեռնարկել է անհրաժեշտ միջոցառումներ»:
Նարդարանում ձերբակալվածների թվում էր ադրբեջանցի հեղինակավոր մահմեդական գործիչ Թալե Բաղիրզադեն։
Ըստ հաղորդագրության՝ խմբավորման առաջնորդները «պատրաստվում էին բռնի կերպով փոխել Ադրբեջանի սահմանադրական կարգն ու երկրում սահմանել շարիաթի նորմեր, ինչի նպատակով ստեղծվել է «Մուսուլմանական միասնություն» շարժումը»: Վերջինս կողմնակիցներ է հավաքագրել Բաքվում և երկրի այլ շրջաններում՝ նրանց զինելով պայթուցիկ նյութերով և զենք-զինամթերքով:
Խումբն, ըստ Ադրբեջանի իրավապահների, Նարդարանում անցկացրել է ապօրինի հավաքներ՝ քննարկելով անհնազանդության ակցիաների կազմակերպումն ու բնակչությանը բաժանելով թռուցիկներ, կազմվել է պաշտոնյաների ցանկ, որոնց դեմ ահաբեկչական գործողություններ են նախապատրաստվել:
Օպերացիայի ընթացքում, ըստ ադրբեջանական լրատվականների, խմբավորման անդամները զինված դիմադրություն են ցուցաբերել, արդյունքում զոհվել է վեց մարդ, այդ թվում՝ երկու ոստիկան:
Մինչդեռ հատուկ օպերացիան հարուցել է Նարդարանի բնակչության դժգոհությունը: Տեղացիները դատապարտում են ոստիկանության գործողությունները և հայտարարում, որ այն դարձել է ավանում արյունահեղության պատճառ:
Մի քանի հարյուր-հոգանոց բողոքի ակցիայի մասնակիցներն ասում են, որ հենց ոստիկանությունն է առաջինը կրակ բացել անզեն մարդկանց վրա:
Ցուցարարները պահանջել են անհապաղ ազատ արձակել ձերբակալվածներին և իշխանություններին տվել 24 ժամ, հակառակ դեպքում՝ սպառնում են շարունակել բողոքը:
Ըստ contact.az-ի՝ Նարդարանի բնակիչները բարիկադներ են կառուցում դեպի ավան տանող ճանապարհներին: Լարվածությունը մեծանում է:
Պատմություններ
