Բրիտանական Independent-ն անդրադարձել է կինոֆիլմերի համացանցային բազայում՝ IMDb-ում, Ցեղասպանության մասին «Խոստումը» պատմական դրամայի կողմնապահ վարկանիշավորմանը։
«Կամ կան ինչ-որ հսկայական կինոթատրոններ, որոնց մասին երբեք չեմ լսել, կամ IMDb-ի օգտատերերը, առանց այն տեսնելու, քվեարկում են՝ ելնելով քաղաքական նախասիրություններից»,- նկատում է Independent-ի Քրիստոֆեր Հութոնը։
Նյութը հրապարակելու պահին ֆիլմը վարկանիշավորել էր 86 հազ․ 991 մարդ, որոնցից 55 հազ․ 165-ը՝ 63,4 տոկոսը, դրել էր 1, 30 հազ․ 865-ը՝ 63,4 տոկոսը, դրել էր 10:
Ըստ բազայում տեղադրված վիճակագրության՝ քվեների մեծ մասը գալիս է ԱՄՆ-ից դուրս ապրող արական սեռի ներկայացուցիչներից։
Հեղինակը ուշադրություն է հրավիրում այն փաստին, որ «Խոստումը» ցուցադրվել է ընդամենը երեք անգամ․ տեղեկությունը պարբերականին հաստատել են Survival Pictures ընկերությունից։
Հոդվածագիրը նշում է, որ չնայած IMDb-ի քաղաքականության մեջ չի մտնում միջամտությունը վարկանիշավորմանը, այդուհանդերձ, շատերը կինոֆիլմերի բազային կոչ են անում միջամտել բացասական քվեարկության միտմանը։
Բրիտանական կայքը մեկնաբանության համար դիմել է IMDb-ին։
***
«Խոստումը» ֆիլմը սեպտեմբերի 12-ին ներկայացվել էր Տորոնտոյի միջազգային կինոփառատոնում և անմիջապես դարձել թուրք և ադրբեջանցի ժխտողականների թիրախը։ Ժապավենի դեմ սկսված արշավի մասին ահազանգել են ինչպես հայաստանյան, այնպես էլ Սփյուռքի գործիչներ:
«Թվում է՝ Ցեղասպանության ժխտողները անգամ մինչև «Խոստումը» ֆիլմի թողարկումը փորձում են նվազեցնել դրա վարկանիշը՝ դնելով 1: Սա իսկական քաղաքական արշավ է և պետք է հետաքննվի IMDB-ի կողմից»,- Ֆեյսբուքում գրառում էր արել աշխարհահռչակ ռոք երաժիշտ Սերժ Թանկյանը՝ կոչ անելով քվեարկել ֆիլմի օգտին՝ դրա դիրքերի «սարսափելի և անարդար» անկմանը հակազդելու համար:
Օրերս ի աջակցություն ֆիլմի հանդես էր եկել աշխարհահռչակ մեկ այլ հայ՝ երգչուհի Շերը, որը ֆիլմը դիտելուց հետո գրառում էր արել Թվիթերում․ «Այսօր երեկոյան դիտել եմ «Խոստումը»։ Դա իրական պատմություն է այն մասին, թե ինչպես թուրքերը կոտորեցին 1,5 մլն հայ 1915թ․։ Էրդողան փաշա․․․ այլևս երբե՛ք»։
THIS NITE IVE SEEN“THE PROMISE“.IT IS THE TRUE STORY Of HOW THE TURKS SLAUGHTERED 1.5 MILLION ARMENIANS IN 1915.ERDOGAN PASHA…NEVER AGAIN‼️
Civilnet
Պատմություններ
