Civilnet
Թուրքիայի նախագահ Ռեջեփ Թայիփ Էրդողանը Պոլսո Հայոց պատրիարքի փոխանորդ Արամ արքեպիսկոպոս Աթեշյանի միջոցով ուղերձ է հղել հայ համայնքին, որն ընթերցվել է պատրիարքությունում անցկացված պատարագի ժամանակ: Էրդողանի ուղերձը, որը հրապարակել է Hurriyet Daily News-ը, թարգմանաբար ներկայացվում է ստորև:
Այս տարի ես մեկ անգամ ևս հարգանքի տուրք եմ մատուցում Օսմանյան հայերի հիշատակին, որոնք իրենց կյանքը կորցրեցին Առաջին աշխարհամարտի ծանր պայմաններում և ցավակցում եմ նրանց սերունդներին:
Հայերն ու թուրքերը, որպես այս տարածաշրջանի երկու հնագույն ազգեր, կիսել են ընդհանուր պատմություն և մշակույթ` ապրելով կողք կողքի հազար տարի:
Հայկական համայնքը մեծ ներդրում է ունեցել Օսմանյան կայսրությունում, ինչպես նաև արդի հանրապետությունում:
Այսօր հայերը` որպես իրավահավասար և ազատ քաղաքացիներ, կարևոր դերակատարություն ունեն մեր երկրի սոցիալական, քաղաքական և առևտրային կյանքում, ինչպես եղել է անցյալում:
Դարեր շարունակ ցավ և ուրախություն կիսած երկու այս ժողովուրդների համատեղ նպատակն է ամոքել անցյալի վերքերը և ամրացնել մարդկային կապերը:
Թուրքիան կատարել է քայլեր, որոնք միտված են անցյալի վերքերի ամոքմանը և երկու ժողովուրդների միջև կապերի ամրապնդմանը:
Մենք վճռական ենք ապագայում Օսմանյան հայերի հիշողության և հայկական մշակութային ժառանգության պահպանմանն ուղղված մեր ջանքերն առաջ տանելու հարցում:
Այս կապակցությամբ ես ցանկանում եմ շեշտել, որ մեր հայկական համայնքի խաղաղությունը, անվտանգությունն ու երջանկությունը մեզ համար հատուկ կարևորություն ունեն: Մենք չենք հանդուրժում մեր հայ քաղաքացիների օտարումն ու բացառումը, ինչպես նաև այն, որ գեթ մեկ հայ իրեն զգա որպես երկրորդ դասի քաղաքացի:
Այս մտքերով ես մեկ անգամ ևս հարգանքի տուրք եմ մատուցում Օսմանյան հայերի հիշատակին, որոնք իրենց կյանքը կորցրեցին 20-րդ դարի սկզբին: Թող միլիոնավոր Օսմանյան քաղաքացիները, որոնք զոհվեցին Առաջին աշխարհամարտի ծանր պայմաններում, խաղաղությամբ հանգչեն:
Պատմություններ
