Գերմանիայի «Կանաչների կուսակցության» համանախագահ, թուրքական ծագումով գերմանացի պատգամավոր Ջեմ Օզդեմիրը Ֆեյսբուքում գրառում է արել Թուրքիայում 2016թ. հուլիսի 15-ին տեղի ունեցած ռազմական հեղաշրջման փորձի տարելիցի կապակցությամբ:
«Ես խստորեն դատապարտում եմ մեկ տարի առաջ հեղաշրջման տապալված փորձը և ոգեկոչում այդ արյունոտ գիշերվա զոհերի հիշատակը: Մինչև այսօր պարզ չէ, թե ով էր հեղաշրջման փորձի հետևում, և երբ էր Էրդողանը տեղեկացել դրա մասին: Պարզ է, սակայն, որ Անկարան օգտագործում է փորձը վաղուց ծրագրված ձերբակալությունների, զանգվածային ձերբակալությունների իրագործման համար»,- գրում է Օզդեմիրը՝ հավելելով, որ տասնյակ հազարավոր մարդիկ են ձերբակալվել, հարյուրավոր համալսարաններ, դպրոցներ, թերթեր, հեռուստաընկերություններ ու ռադիոկայաններ են տուժել:
Թուրքիայի խորհրդարանում ընդդիմությունը լռեցվել է: Դա շատ հեռու է ժողովրդավարությունից:
«Մենք հետևանքներն այստեղ էլ ենք զգում: Էրդողանն իր քարոզչությամբ մեծ սեպ է խրել Գերմանիայի թուրքական համայնքում: Բազմաթիվ մարդիկ, որ հարևան էին կամ ընկեր, այժմ քաղաքական ընդդիմախոս են դարձել»,- շարունակում է խորհրդարանականը:
Օզդեմիրի խոսքով՝ դա ճակատագրական էր նաև Գերմանիայի կոալիցիոն կառավարության համար, որը Անկարային հստակ չի ասել՝ «Եվրոպան չի հանդուրժում ժողովրդավարության և օրենքի գերակայության հարցերում որևէ զիջում»:
Պատգամավորը ցանկություն է հայտնել, որ Թուրքիան լինի մի երկիր, որտեղ բազմազանությունն ու հարգանքը համագոյակցության հիմք կստեղծեին:
«Անցյալ կիրակի հզոր ազդանշան էր, երբ Ստամբուլում հավաքված ավելի քան մեկ մլն մարդիկ ցույց էին անում ընդդեմ Էրդողանի ատելության և բացառման քաղաքականության»,- եզրափակել է Գերմանիայի խորհրդարանի անդամը՝ նկատի ունենալով Թուրքիայի գլխավոր ընդդիմության «Արդարության քայլարշավը»:
Civilnet
Պատմություններ
