Թուրքական մամուլում ակտիվորեն լուսաբանվում է Հայաստանի վարչապետ Նիկոլ Փաշինյանի՝ աշխարհահռչակ պոլսահայ տնտեսագետ Տարոն Աճեմօղլուի հետ ունեցած հեռախոսազրույցը: Ինչպես իր ֆեյսբուքյան էջում տեղեկացրեց Փաշինյանը, Աճեմօղլուն պատրաստ է աջակցել Հայաստանին՝ տնտեսությունը վերականգնելու և զարգացնելու հարցում: Ermenihaber գործակալությունը հետևել է արձագանքներին և առանձնացրել մի քանի խորագրեր։
«Հայաստանի տնտեսության վերականգնմանն աջակցելու համար Աճեմօղլուին Հայաստան հրավիրելու Փաշինյանի նախաձեռնության մասին լուրերը հաղորդվում են ուշագրավ վերնագրերով:
Թուրքական առաջատար Hurriyet պարբերականի կայքում թեմայի վերաբերյալ հրապարակումը ներկայացվել է «Աճեմօղլուն է փրկելու Հայաստանը» վերնագրով:
Ընդդիմադիր T24.com.tr լրատվական կայքը լուրը հաղորդել է «Աշխարհի առաջատար տնտեսագետներից Աճեմօղլուն կկարգավորի Հայաստանի տնտեսությունը» վերտառությամբ:
Հետաքրքրական է նաև թուրքական Ekonomihaber.com տնտեսական ուղղվածությամբ կայքի հրապարակման վերնագիրը՝ «Հայաստանի վարչապետի օգնության կանչն Աճեմօղլուին»:
Մեկ այլ տնտեսական պորտալ էլ (ekonomi7.com) Աճեմօղլուի՝ Հայաստան կատարելիք այցի վերաբերյալ լուրը հաղորդել է հետևյալ վերտառությամբ՝ «Աջեմօղլուն թևերը քշտել է Հայաստանի տնտեսության համար»:
«Աճեմօղլուն գնում է փրկելու Հայաստանի տնտեսությունը» գրում է Milliyet թերթի կայքը:
Թուրքական ազգայնական Yeni çağ թերթի կայքն էլ թեմայի վերաբերյալ լուրը հրապարակել է «Քեմալ Դերվիշի մոդելը Հայաստանում» վերտառությամբ:
Քեմալ Դերվիշը հայտնի թուրք տնտեսագետ և քաղաքական գործիչ է: Նա երկար տարիներ աշխատել է Համաշխարհային բանկում: 2000թ․ տնտեսական ճգնաժամից հետո իշխանությունների կողմից հրավիրվել է Թուրքիա: Նրա մշակած տնտեսական քաղաքականության շնորհիվ Թուրքիան տնտեսական ճգնաժամը հաղթահարեց նվազագույն վնասով: 2001-2002թթ․ զբաղեցրել է Թուրքիայի Էկոնոմիկայի նախարարի պաշտոնը, 2005-2009թթ․ղեկավարել է ՄԱԿ-ի Զարգացման ծրագիրը:
Թեմայի վերաբերյալ Հայաստանի վարչապետի ֆեյսբուքյան գրառումը մեջբերած թուրքական լրատվականները հիշեցրել են, որ Ստամբուլում ծնված և Գալաթասարայի վարժարանն ավարտած, ապա Լոնդոն տեղափոխված Աճեմօղլուն աշխարհի ամենահայտնի 10 տնտեսագետներից մեկն է»։