Փաշինյանն ու Ալիևը ծանոթացել են

Մոսկվայում տեղի է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի ծանոթությունը։ Ֆեյսբուքյան էջում Նիկոլ Փաշինյանը գրել է, որ իրենց ծանոթացրել է ՌԴ նախագահ Վլադիմիր Պուտինը։ «Ֆուտբոլի խաղից հետո Ռուսաստանի Դաշնության նախագահը փոքրիկ ընդունելություն էր կազմակերպել ԱՊՀ երկրների ղեկավարների ֆորմատով։ Այնտեղ ներկա էր նաև Ադրբեջանի նախագահ Իլհամ Ալիևը: Եվ Ռուսաստանի նախագահը մեզ ծանոթացրեց: Մենք ծանոթացանք պարզապես, որևէ ուրիշ խոսակցություն տեղի չունեցավ, որևէ քննարկում, բովանդակային խոսակցություն տեղի չունեցավ»,- ընդգծել է Նիկոլ Փաշինյանը: Աշխատանքային այցով Ռուսաստանի Դաշնությունում գտնվող վարչապետ Նիկոլ Փաշինյանը և տիկին Աննա Հակոբյանը Մոսկվայի «Լուժնիկի» մարզադաշտում երեկ ներկա են գտնվել ֆուտբոլի Աշխարհի առաջնության բացման հանդիսավոր արարողությանն ու հետևել առաջնության առաջին խաղին, որում հանդիպել են Ռուսաստանի և Սաուդյան Արաբիայի ազգային հավաքականները: Աշխարհի առաջնության բացմանը ներկա են եղել նաև ՌԴ նախագահ Վլադիմիր Պուտինը և մի շարք այլ պետությունների նախագահներ ու կառավարությունների ղեկավարներ: Հունիսի 13-ին Մոսկվայում կայացել է Հայաստանի վարչապետ Նիկոլ Փաշինյանի հանդիպումը Ռուսաստանի նախագահ Վլադիմիր Պուտինի հետ։ Նույն օրը տեղի է ունեցել Պուտին-Ալիև հանդիպում, որի ընթացքում Ռուսաստանի ղեկավարը ադրբեջանցի պաշտոնակցին հրավիրել է օգոստոսի 30-ին այցելելու Մոսկվա։ Ալիևների ընտանիքը հունիսի 14-ին ներկա է գտնվել «Լուժնիկի» մարզադաշտում ֆուտբոլի Աշխարհի առաջնության բացման հանդիսավոր արարողությանն ու հետևել առաջնության առաջին խաղին։ Պուտինի հետ լուսանկար է հրապարակել Ադրբեջանի առաջին տիկին Մեհրիբան Ալիևան։