Միջնորդները Մնացականյան-Մամեդյարով հանդիպում են նախապատրաստում

Ադրբեջանի արտաքին գործերի նախարար Էլմար Մամեդյարովը տեսակապի միջոցով հանդիպում է անցկացրել ԵԱՀԿ Մինսկի խմբի համանախագահներ Իգոր Պոպովի (Ռուսաստան), Էնդրյու Շեֆերի (ԱՄՆ) և Ստեֆան Վիսկոնտիի (Ֆրանսիա), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպշիկի հետ։ Հանդիպման ընթացքում քննարկվել է ղարաբաղյան կարգավորման գործընթացում առկա իրավիճակը, ինչպես նաև քայլերը, որոնք գործադրվելու են առաջիկա ամիսներին՝ հետհամավարակային շրջանում։ Ըստ պաշտոնական հաղորդագրության՝ կողմերը պայմանավորվել են հստակեցնել Հայաստանի ու Ադրբեջանի արտաքին գործերի նախարարների հերթական հանդիպման վայրն ու ժամկետը՝ Մինսկի խմբի համանախագահների միջնորդությամբ։ Մնացականյան-Մամեդյարով վերջին հանդիպումը տեղի է ունեցել այս տարվա հունվարի 29-ին և 30-ին Ժնևում ԵԱՀԿ Մինսկի խմբի համանախագահների միջնորդությամբ և մասնակցությամբ։ Տեսակապի միջոցով նախարարների քննարկում է տեղի ունեցել ապրիլի 21-ին։