Civilnet
Մենք հարձակվելու որևէ նպատակ չունենք, դիրքերը բարելավելու որևէ խնդիր չունենք, մեր խնդիրն է՝ անվտանգության գոտին պահպանելով՝ պահպանել մեր ազգաբնակչության անվտանգությունը․ ասել է «Իմ քայլը» խմբակցության պատգամավոր Անդրանիկ Քոչարյանը սեպտեմբերի 28-ին լրագրողների հետ ճեպազրույցում։
Քոչարյանը համարում է, որ երկրում ռազմական դրություն հայտարարելը ամենակարևոր դրսևորումն էր պետության կողմից՝ նշելով, որ եթե այսպիսի գործողություններ ձեռնարկվեին 2016-ի ապրիլին, «պատկերը գուցե այլ լիներ»։
«Մոբիլիզացիոն գործընթացը ամենամեծ ձեռքբերումն էր երեկվա ընթացքում, և այս պահի դրությամբ մենք ունենք հաջողություններ։ Առավոտյան մենք հաջողություններ ենք գրանցել Ասկերան-Մարտունի հատման հատվածում, Ջաբրայիլում, հակառակորդը տվել է մարդկային և տեխնիկական կորուստներ»,- ասել է պատգամավորը։
Ըստ նրա՝ Ադրբեջանն այս անգամ Թուրքիայի հրահրմամբ օգտագործել է իր զինանոցի այս պահին գուցե 70%-ը։
«Սա շատ ուժեղ հարված էր, ես 90-ականներից բանակի ակունքներում եմ, եղել են գործողություններ՝ մեծ, ծավալուն, վերելքներ, անկումներ, բայց երեկվա գործողություններն իրենց ծավալով ահռելի էին»,- նշել է նա։
Անդրադառնալով ճանաչման հարցին՝ Քոչարյանն ասաց, որ քանի որ գործողությունները հիմա մեզ համար բարենպաստ են գնում, ճանաչումը կարող է մի քանի օր սպասել։
«Դա կախված է զարգացումներրից, մարտի դաշտում ինչ ընթացք կլինի։ Ճանաչումն էլ օրակարգում կա, վարչապետը նշեց էդ մասին»։
Անդրադառնալով խոսակցություններին, թե ինչու օրինակ «Իսկանդերը» չի օգտագործվում, Անդրանիկ Քոչարյանն ասաց, որ «երբ որ պետք լինի, դա էլ գործի կդնենք»։
Պատգամավորը նշեց, որ մեր գործելաոճի մեջ կարևոր հանգամանքներից է այն, որ վիրավորների մասին անմիջապես տեղյակ են պահում ծնողներին, հարազատներին։ Նախկինում դա միշտ ուշացվել է, ինչը, ըստ Քոչարյանի, բերել է որոշակի լարվածության։
Նա նաև նշեց, որ բանակն այս կերպ ստացավ հնարավորություն ոչ միայն մեջքը ուղղելու հուլիսյան դեպքերից հետո, այլև հնարավորություն՝ Հայաստան պետությունը՝ Արցախի հետ միասին, դարձնել տարածաշրջանի շատ կարևոր խաղացող։
«Մեր նպատակն է ունենալ այն պրոֆեսիոնալ բանակի հիմքերը, որոնք մարտական գործողություններում կունենան քիչ զոհեր, և ունենանք այնպիսի ինժեներական կարողություններ առաջնագծում, որը մեր բանակի կյանքի տևողությունը կավելացնի»։
Սաթենիկ Հակոբյան
Պատմություններ
