Civilnet
Սեպտեմբերի 29-ին Վիեննայում ԵԱՀԿ Մշտական Խորհրդի հատուկ նիստ է գումարվել ղարաբաղյան հակամարտության հարցով։ ԵԱՀԿ-ում Ալբանիայի նախագահությամբ նիստին մասնակցել են ԵԱՀԿ անդամ 57 պետությունների ներկայացուցիչներ:
Բացելով նիստը՝ Մշտական խորհրդի նախագահ դեսպան Իգլի Հասանին կրկին հայտարարել է նախագահության մտահոգության մասին՝ կապված շարունակվող մարտերի և տեղում իրադրության վատթարացման հետ: Մտահոգվելով զոհերի թվի աճով՝ նա կրկնել է լարվածության անհապաղ թոթափման ԵԱՀԿ նախագահության կոչը և ցավակցություն հայտնել զոհվածների ու վիրավորների ընտանիքներին ու մերձավորներին:
Գործող նախագահի անձնական ներկայացուցիչ, դեսպան Անջեյ Կասպշիկը հայտարարել է, որ նա տեղեկատվություն է ստանում անմիջապես մարտի դաշտից և ներգրավված կողմերից՝ ամենաբարձր մակարդակով: Դեսպան Կասպշիկն ասել է, որ մշտական կապի մեջ է կողմերի հետ, և իր թիմը պատրաստ է վերսկսել դաշտային մշտադիտարկումը, երբ իրավիճակը թույլ կտա:
Մինսկի խմբի համանախագահ երկրների՝ Ֆրանսիայի, Ռուսաստանի Դաշնության և Ամերիկայի Միացյալ Նահանգների ներկայացուցիչները կրկնել են համանախագահների կոչը բոլոր կողմերին՝ անհապաղ դադարեցնել ռազմական գործողությունները և վերսկսել բանակցությունները՝ հակամարտության կայուն կարգավորում գտնելու համար:
Սաթենիկ Հակոբյան
Պատմություններ
