Պետք է ամերիկացիներից հարցնել՝ որտեղից են վերցրել սկանդինավյան խաղաղապահների գաղափարը․ Ռուդենկո

Ռուսաստանի արտաքին գործերի նախարարությունն արձագանքել է ԱՄՆ-ի առաջարկին՝ ղարաբաղյան հակամարտության գոտում սկանդինավյան խաղաղապահների տեղակայման վերաբերյալ։ Ըստ ՌԴ արտաքին գործերի փոխնախարար Անդրեյ Ռուդենկոյի՝ այդ առաջարկը պետք է համաձայնեցվի հակամարտության կողմերի հետ։ «Պետք է ամերիկացիներից հարցնել՝ որտեղից են վերցրել այդ առաջարկներն ու գաղափարները։ Բոլոր հնարավոր մեխանիզմների անհրաժեշտ պարամետրերը պետք է համաձայնեցվեն հակամարտության կողմերի հետ խորհրդակցությունների միջոցով»,- ասել է Ռուդենկոն։ Պատասխանելով հարցին, թե ռուսաստանյան կողմը տեղյակ է այդ գաղափարից, Ռուդենոկն ասել է, որ հայտնի է միայն այն, ինչ ասել է ԱՄՆ նախագահի՝ ազգային անվտանգության հարցերով խորհրդական Ռոբերտ Օ'Բրայենը։ *** Անցյալ շաբաթ Ռոբերտ Օ'Բրայենն առաջարկել էր Լեռնային Ղարաբաղի հակամարտության գոտում սկանդինավյան խաղաղապահներ տեղակայել։ Ըստ Օ'Բրայենի` հակամարտության գոտում ցանկացած զինված խաղաղապահ ուժ չպետք է ներառի ներկայացուցիչներ Մինսկի խմբի համանախագահ երկրներից, ինչպես նաև հարևան պետություններից: «Թուրքիայի որևէ տեսակի միջնորդություն կամ խաղաղապահ դերակատարություն անընդունելի է ինչպես Միացյալ Նահանգների, այնպես էլ Հայաստանի համար»,- Կալիֆոռնիայի հայ համայնքի ներկայացուցիչների հետ հանդիպմանն ասել է Օ'Բրայենը: