Անհայտ կորածների և զոհվածների մարմինները հարազատներին փոխանցելու հարցերը՝ ՌԴ ղեկավարության ուշադրության ներքո

Հայաստանում Ռուսաստանի դեսպանությունը հայտարարություն է տարածել՝ նշելով, որ անհայտ կորած զինծառայողների հայտնաբերման և զոհվածների մարմինները հարազատներին փոխանցելու հարցը գտնվում է Ռուսաստանի Դաշնության բարձրագույն ղեկավարության ուշադրության կենտրոնում։ «Դեսպանաթյունը ստանում է բազմաթիվ դիմումներ Լեռնային Ղարաբաղում մարտական գործողությունների ընթացքում անհայտ կորած զինծառայողների հայտնաբերման և զոհվածների մարմինները հարազատներին փոխանցելու վերաբերյալ: Լիովին կիսում ենք մարդկային մեծ ողբերգությանը բախված ընտանիքների տագնապն ու վիշտը: Ռուսաստանի խաղաղապահ զորախումբը և հումանիտար արձագանքման միջգերատեսչական կենտրոնն անմիջականորեն ներգրավված են այդ սուր խնդրի լուծմանը՝ սերտ համագործակցելով Հայաստանի Հանրապետության և Ադրբեջանի Հանրապետության իրավասու մարմինների, ինչպես նաև լիազորված միջազգային կազմակերպությունների հետ: Այս հարցը գտնվում է Ռուսաստանի Դաշնության բարձրագույն ղեկավարության ուշադրության կենտրոնում, որը հատուկ նշանակություն է տալիս 2020 թվականի նոյեմբերի 9-ի եռակողմ հայտարարության դրույթների համապարփակ իրականացմանը: Հիշեցնում ենք, որ այս ողբերգական իրավիճակում հայտնվածներին օգնելու համար Հայաստանի Հանրապետության պաշտպանության նախարարության կողմից ստեղծվել է Լեռնային Ղարաբաղի հակամարտության ընթացքում զոհված, անհայտ կորած և գերեվարված զինծառայողների և այլ անձանց վերաբերյալ տեղեկատվության հավաքման և մշակման հատուկ հանձնաժողով»,- ասված է հաղորդագրությունում։ *** Օրերս ՀՀ նախագահի գրասենյակը հայտնել էր, որ նախագահ Արմեն Սարգսյանը ադրբեջանական կողմում գտնվող ռազմագերիների, պատանդների վերադարձի հարցով դիմել է Ռուսաստանի Դաշնության նախագահ Վլադիմիր Պուտինին: Արցախի մարդու իրավունքների պաշտպանի գրասենյակը հայտնում է, որ տեսանյութերից առանձնացրել է մոտ 60 ռազմագերի, որոնցից միայն փոքր մասի ինքնությունը դեռ չեն կարողացել պարզել: Դեկտեմբերի 1-ին ադրբեջանական կողմը հայտարարել է, որ պատրաստ է գերիների փոխանակման «բոլորը բոլորի դիմաց» սկզբունքով։ Այս առաջարկը Բաքուն բազմիցս հնչեցրել էր մինչև արցախյան վերջին պատերազմը։ Այն ժամանակ առաջարկի հիմքում ընկած էր Ադրբեջանի, մասնավորապես, նախագահ Իլհամ Ալիևի ձգտումը՝ վերադարձնել դիվերսանտներ Շահբազ Գուլիևին և Դիլհամ Ասկերովին։