ՄԱԿ-ը բոլոր կողմերին համագործակցության կոչ է անում՝ Ղարաբաղ առաքելություն ուղարկելու նպատակով

Լեռնային Ղարաբաղ առաքելություն ուղարկելու ՄԱԿ-ի մտադրությունն ուժի մեջ է․ կազմակերպությունը բոլոր կողմերին համագործակցության կոչ է անում տարածաշրջան որքան հնարավոր է շուտ գալու նպատակով։ Այս մասին հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը։ Ավելի վաղ հայտարարվել էր, որ առաքելությունը Ղարաբաղ կգա դեկտեմբերի սկզբին, սակայն դա տեղի չի ունեցել։ «Ես չէի ասի, որ որևէ խոչընդոտներ կան։ Մանրամասները ճշգրտվում են»,- ասել է Դյուժարիկը։ Նրա խոսքով՝ ՄԱԿ-ը պատրաստ է բավարարել հակամարտությունից տուժածների հումանիտար կարիքները։ Ավելի վաղ Կարմիր խաչի միջազգային կոմիտեն հայտնել էր, որ ընդլայնում է իր ներկայությունը Լեռնային Ղարաբաղում, քառապատկում բյուջեն։