Civilnet
Հայաստանի պետական սահմանի սահմանազատման ու սահմանագծման աշխատանքները համակարգելու համար ստեղծվել է աշխատանքային խումբ՝ շահագրգիռ պետական մարմինների ներգրավմամբ։ Այդ մասին ՍիվիլՆեթի գրավոր հարցմանն ի պատասխան՝ հայտնել են կառավարությունից։
Հարցին, թե արդյոք Թուրքիայի ներկայացուցիչներ ներգրավվա՞ծ են սահմանազատման աշխատանքներում, կառավարությունից բացասական պատասխան են տվել՝ հայտնելով, որ սահմանազատմանը մասնակցում են Հայաստանի, Ադրբեջանի ու Ռուսաստանի ներկայացուցիչները։ Հայկական կողմից այս աշխատանքներին մասնակցում է ԶՈՒ Գլխավոր շտաբը։
Կառավարությունը հաստատում է՝ «Գեոդեզիայի և քարտեզագրության» ՊՈԱԿ-ը լուծարվել է։ Կառավարությունը համապատասխան որոշում ընդունել է այս ապրիլին։
«Միաժամանակ ՀՀ վարչապետի 2020 թվականի ապրիլի 23-ի 486-Լ որոշմամբ Կադաստրի կոմիտեի կառուցվածքում ստեղծված գեոմատիկայի կենտրոնի կանոնադրության գործառույթներում ներառված են նախկին «Գեոդեզիայի և քարտեզագրության» ՊՈԱԿ-ի՝ բացառապես պետական նշանակության գործառույթները, բացի ձեռնարկատիրական գործունեության գործառույթների»,- հայտնել են կառավարությունից։
Նախկին ՊՈԱԿ-ի յոթ աշխատակիցներ, որոնք ներկայում աշխատում են Կադաստրի կոմիտեի գեոմատիկայի կենտրոնում, «ներգրավված են Հայաստանի սահմանների սահմանագծման ու սահմանազատման աշխատանքներին և ՀՀ զինված ուժերի մասնագետների հետ մշտապես ունենում են փորձի փոխանակման ու խորհրդատվական բնույթի աշխատանքներ»։
Կառավարությունը նաև հայտնել է, որ «սանձազերծված պատերազմի հետևանքով սահմանամերձ դարձած համայնքների ցանկը մշակման փուլում է և ենթակա է քննարկման իրավասու գերատեսչությունների կողմից»։
Մկրտիչ Կարապետյան
Պատմություններ
