Ընտրակեղծիքների մասին ահազանգերը շարունակվում են

Ստացվել են մի շարք տեղեկություններ ընտրակեղծիքների մասին:

Մասրիկում թիվ 23/57 ընտրատեղամասում «բոլորը տեսողության խնդիր» ունեն ու օգնություն են ուզում քվեարկելու համար:

Թ. 3/09 ԸԸՏ-ում տատիկների հետ մտնում են քվեախցիկ ու հուշում ՀՀԿ-ի թիվը:

Մասիս քաղաքի թ. 16/01 ընտրատեղամասում գրանցվել է մեկ դեպք, երբ առանց անձնագրի քվեաթերթիկ են տվել, այնուհետ արձանագրություն են կազմել ու քվեաթերթիկն անվավեր ճանաչել։ Այդ պահին ընտրատեղամասում դիտորդ չի եղել։

Թ. 32/4 ԸԸՏ-ում բաց քվեարկություն է իրականացվել: «Չորս հոգի մտնում են, քննարկում և ընտրում»,-նշում է դիտորդ Ֆլորա Ավագյանը:

Գյումրիում լարված մթնոլորտ է: Երթևեկությունը կաթվածահար է եղել, գյումրեցիներից ահազանգեր են ստացվում այն մասին, որ քաղաքը սպասարկող միկրոավտոբուսները նորմալ չեն աշխատում, իսկ առանձին ընտրատեղամասերում նկատվում են մարդկանց կուտակումներ:

Տերյան 42 հասցեում գտնվող 10/23 ընտրատեղամասում սայլակով հաշմանդամը քվեարկել է ընտրատեղամասից դուրս` հենց փողոցում, քանի որ չէր կարող ներս մտնել: