Civilnet
Հայաստանի արտաքին գործերի նախարարության մամուլի խոսնակ Վահան Հունանյանը հերքում է Թուրքիայի արտգործնախարար Մևլութ Չավուշօղլուի՝ հայ-թուրքական սահմանի վերասահմանագծման վերաբերյալ հայտարարությունը։
«Ի պատասխան ԶԼՄ֊ների հարցման, տեղեկացնում ենք, որ Հայաստանի և Թուրքիայի միջև սահմանի վերասահմանագծման վերաբերյալ որևէ քննարկում կամ պայմանավորվածություն չկա։ Նման հարց օրակարգում չկա»,- գրել է Հունանյանը։
Թուրքիայի արտաքին գործերի նախարար Մևլյութ Չավուշօղլուն, լրագրողների հետ զրույցում ամփոփելով Լատինական Ամերիկա կատարած իր այցերը, անդրադարձել է Հայաստանի հետ հարաբերություններին՝ խոսելով հատուկ ներկայացուցիչների առաջիկա երրորդ հանդիպման մասին։
«Այդ հանդիպմանը քննարկվելու են տարբեր հարցեր, որոնց ուղղությամբ առաջիկայում քայլեր են ձեռնարկվելու։ Համաձայնություն կա սահմանների վերաճշգրտման հարցում»,- ասել է Չավուշօղլուն:
«Ինչպե՞ս է այն իրականացվելու, կամ արդյոք ընդհանուր հանձանժողո՞վ է ստեղծվելու» հարցադրում անելով՝ Թուրքիայի ԱԳ նախարարը որպես օրինակ է բերել Հայաստանի ու Ադրբեջանի միջև ընդհանուր հանձնաժողովի ստեղծումը։
***
Հայաստան-Թուրքիա կարգավորման գործընթացի շրջանակներում երկու երկրների հատուկ ներկայացուցիչների երրորդ հանդիպումը տեղի կունենա մայիսի 3-ին` Վիեննայում։
Պատմություններ
