<strong>Սահմանադրական դատարանը հաստատեց Միջազգային քրեական դատարանի Հռոմի կանոնադրությունը</strong>

Միջազգային քրեական դատարանի՝ Հռոմի կանոնադրությունը մարտի 24-ին ճանաչվեց Հայաստանի Սահմանադրությանը համապատասխանող։ Նման որոշում է կայացրել Սահմանադրական դատարանը։ Այս գործընթացից հետո կառավարությունը կարող է դիմել հաջորդ քայլին, այն է՝ կանոնադրությունը վավերացման համար ուղարկել Ազգային ժողով։ 

Հայաստանի կառավարությունը Միջազգային քրեական դատարանի՝ Հռոմի կանոնադրության վավերացման գործընթացը մեկնարկեց 2022-ի վերջին։ Գործադիրը դիմեց ՍԴ՝ պարզելու, թե արդյոք ավելի քան երկու տասնամյակ առաջ ստորագրված, սակայն այդպես էլ չվավերացված փատաթուղթը համապատասխանում է ՀՀ Սահմանադրությանը։

Ըստ կառավարության՝ վավերացումից հետո Հայաստանը հնարավորություն կունենա դիմել Միջազգային քրեական դատարան՝ Ադրբեջանի պատերազմական հանցագործությունները միջազգային իրավական քննության առարկա դարձնելու համար։

Այս փաստաթուղթը ՀՀ Սահմանադրական դատարանը հակասահմանադրական էր ճանաչել 2004-ին։ Մասնավորապես ՍԴ-ն գտել էր, որ «Միջազգային քրեական դատարանի կանոնադրության մասին համաձայնագրում (կից հայտարարությամբ) ամրագրված այն պարտավորությունը, ըստ որի Միջազգային քրեական դատարանը լրացնում է ՀՀ ներպետական քրեական իրավազորության մարմինները» չի համապատասխանում ՀՀ Սահմանադրությանը։ Բացի այդ, ըստ ՍԴ-ի՝ Սահմանադրությանը չի համապատասպանում նաև կանոնադրության՝ 105 հոդվածի դրույթներով ստանձնած պարտավորությունները, որոնցով բացառվում է դատապարտված անձանց ներպետական ընթացակարգով ներման իրավունքի և համաներման հնարավորության իրացումը:

Միջազգային քրեական դատարանի թեման սկսվեց ակտիվ քննարկվել հասարակական-քաղաքական շրջանակներում մարտի 17-ից հետո, երբ հայտնի դարձավ, որ դատարանը Ռուսաստանի նախագահ Վլադիմիր Պուտինի և Ռուսաստանի երեխայի իրավունքների պաշտպան Մարիա Լվովա-Բելովային ձերբակալման կարգադրություն է արձակել։