ՀՀ ԱԳՆ-ն Ռուսաստանին կոչ է անում «ի վերջո կատարել ստանձնած պարտավորությունը»

Հայաստանի արտաքին գործերի նախարարությունը Ադրբեջանի կողմից Լաչինի միջանցքում անցակետի տեղադրման վերաբերյալ հայտարարություն է տարածել, որն ամբողջությամբ ներկայացնում ենք ստորև․

«2023-ի ապրիլի 23-ին Ադրբեջանի իշխանությունները, կոպտորեն խախտելով 2020-ի նոյեմբերի 9-ի եռակողմ հայտարարության 6-րդ կետը, արդեն պաշտոնապես արգելափակել են Լաչինի միջանցքը՝ քայլեր ձեռնարկելով միջանցքում՝ ՌԴ խաղաղապահ զորակազմի պատասխանատվության գոտում անցակետ տեղադրելու ուղղությամբ:

Ադրբեջանի զինված ուժերի կողմից այսօր իրականացված այս քայլը չի կարելի համարել Ադրբեջանի հերթական սադրանք անգամ․ այն իրապես 2020-ի նոյեմբերի 9-ի եռակողմ հայտարարության հիմնարար դրույթներից մեկի աղաղակող խախտում է՝ միտված Լեռնային Ղարաբաղում էթնիկ զտումներ իրականացնելու և Լեռնային Ղարաբաղն ամբողջությամբ հայաթափելու իր քաղաքականության հետևողական իրագործմանը։ Նախորդ տարվա դեկտեմբերի 12-ից շինծու բնապահպանական պատրվակներով Լաչինի միջանցքի շարունակական ապօրինի արգելափակումը և այսօր արդեն ակնհայտ կեղծ և անհիմն պատրվակներով անցակետի տեղադրումը հենց այս ծրագրված քաղաքականության հետևողական իրականացման հերթական քայլերն են։

Այս գործողությունն իրականացվում է ի հեճուկս միջազգային հանրության միանշանակ հայտարարությունների և հատկապես Միջազգային արդարադատության դատարանի՝ 2023-ի փետրվարի 22-ի իրավաբանական պարտադիր ունեցող վճռի: Ավելին, Ադրբեջանի ղեկավարությունը նույնիսկ ջանք չի գործադրում ոչ միայն ձեռք բերված հանրահայտ պայմանավորվածությունները կատարելու, այլև իր կողմից միջազգային իրավունքի հիմնարար նորմերի շարունակական խախտումները կոծկելու ուղղությամբ և ամեն կերպ լարում է տարածաշրջանային իրավիճակը` հող նախապատրաստելով լայնածավալ ուժի կիրառման համար։

Հայաստանի Հանրապետությունը՝ որպես նոյեմբերի 9-ի եռակողմ հայտարարության ստորագրող կողմ, անընդունելի է համարում և խստորեն դատապարտում է Ադրբեջանի՝ Լաչինի միջանցքում ապօրինի անցակետ տեղադրելու այս քայլը։ Այն, ինչպես նաև Ադրբեջանի կողմից մինչ այդ իրականացված նմանօրինակ գործողությունները՝ զուգորդված չդադարող հայատյաց ու սպառնալից հռետորաբանությամբ, միտված են տապալելու Հայաստանի և Ադրբեջանի միջև հարաբերությունների կարգավորման փաստաթղթի շուրջ բանակցությունները:

Կոչ ենք անում Ռուսաստանի Դաշնությանն ի վերջո կատարել եռակողմ հայտարարության 6-րդ կետով ստանձնած իրենց պարտավորությունը՝ վերացնելով միջանցքի ապօրինի արգելափակումը և ապահովելով ադրբեջանական ուժերի դուրսբերումը Լաչինի միջանցքի ողջ անվտանգության գոտուց, իսկ միջազգային անվտանգության մանդատով օժտված ՄԱԿ-ի անդամ պետություններին հստակորեն արձանագրել Ադրբեջանի կողմից տարածաշրջանային անվտանգությունը խարխլող գործողությունները և գործուն քայլեր ձեռնարկել միջազգային բարձրագույն դատական ատյանի վճռի անվերապահ կատարման ուղղությամբ»,- ասված է հայտարարությունում։

***

Ապրիլի 23-ին Ադրբեջանը անցակետ է տեղադրել Հակարի գետի վրայի կամրջի մոտ՝ Լաչինի միջանցքում։ Ադրբեջանը հայտարարում է, որ անցագրային վերահսկողությունը կիրականացվի ռուս խաղաղապահների հետ։

https://civilnet.am/news/698128/%d5%a1%d6%80%d6%81%d5%a1%d5%ad%d5%ab-%d5%a1%d5%ad-%d5%b6-%d5%a4%d5%ab%d5%b4%d5%b8%d6%82%d5%b4-%d5%a7-%d5%a5%d5%bc%d5%a1%d5%af%d5%b8%d5%b2%d5%b4-%d5%b0%d5%a1%d5%b5%d5%bf%d5%a1%d6%80%d5%a1%d6%80%d5%b8%d6%82%d5%a9%d5%b5%d5%b8%d6%82%d5%b6%d5%a8-%d5%bd%d5%bf%d5%b8%d6%80%d5%a1%d5%a3%d6%80%d5%a1%d5%ae-%d5%af%d5%b8%d5%b2%d5%b4%d5%a5%d6%80%d5%ab%d5%b6%d5%9d-%d5%a1%d5%b4%d5%a5%d5%b6%d5%a1%d5%af%d5%a1%d6%80%d5%b3-%d5%aa%d5%a1%d5%b4%d5%af%d5%a5%d5%bf%d5%b8%d6%82%d5%b4-%d5%a1%d5%af%d5%b6%d5%af%d5%a1%d5%ac%d5%a5%d5%ac%d5%b8%d5%be-%d5%a3%d5%b8%d6%80%d5%ae%d5%b8%d6%82%d5%b6-%d6%84%d5%a1%d5%b5%d5%ac%d5%a5%d6%80/