Երևանն ու Ստեփանակերտը հերքում են Ադրբեջանի ՊՆ հաղորդագրությունները

Հայաստանի և Արցախի պաշտպանության նախարարությունները հերքում են Ադրբեջանի պաշտպանական գերատեսչության տարածած հաղորդագրությունները։

«Ադրբեջանի պաշտպանության նախարարության տարածած հաղորդագրությունն այն մասին, թե իբր օգոստոսի 21-ի ժամը 22:50-ից մինչև օգոստոսի 22-ի 02:05-ի սահմաններում ՀՀ ԶՈւ ստորաբաժանումները կրակ են բացել սահմանագոտու հարավարևմտյան և հարավարևելյան հատվածներում տեղակայված ադրբեջանական դիրքերի ուղղությամբ, չի համապատասխանում իրականությանը»,- ասված է ՀՀ պաշտպանության նախարարության հաղորդագրությունում։

ՊՆ-ից նաև հերքում են տեղեկությունը, թե հայկական կողմի կրակոցից ադրբեջանցի զինծառայող է վիրավորվել։

Արցախի պաշտպանության բանակն էլ նշում է, որ դիտարկման տեխնիկական միջոցների ճնշման մասին ադրբեջանական լուրը կեղծ է։

«Ադրբեջանի ՊՆ տարածած հաղորդագրությունն այն մասին, թե իբր ՊԲ ստորաբաժանումների կողմից, ադրբեջանական դիրքերի ու հաղորդակցման ուղիների նկատմամբ դիտարկման ու հսկման նպատակով տեղադրվել են տեխնիկական միջոցներ և որոնք իբր, օգոստոսի 21-ին ճնշվել են ադրբեջանական ԶՈւ ստորաբաժանումների կողմից հերթական ապատեղեկատվությունն է»,- նշված է հաղորդագրությունում։