Civilnet
Լեռնային Ղարաբաղից բռնի տեղահանված շուրջ 400 ուսուցիչներ՝ տեղահանված ուսուցիչների մեկ երրորդը, աշխատում է Հայաստանի կրթական համակարգում: Այս մասին տարեվերջյան ասուլիսում հայտարարեց ՀՀ կրթության, գիտության, մշակույթի և սպորտի նախարար Ժաննա Անդրեասյանը, փոխանցում է «Արմենպրեսը»։
«Նրանցից ավելի քան 200-ը գործուղվել են մարզեր, և նրանց աշխատավարձի 30 տոկոսի չափով հավելավճար է տրամադրվում։ Իսկ Սյունիքի, Վայոց Ձորի, Տավուշի, Գեղարքունիքի մարզերի մի քանի համայնքներում, բացի հավելավճարից, ստանում են նաև ամսական 50 հազար դրամ գումար»,- ասաց Անդրեասյանը։
Նախարարը տեղեկացրեց, որ ավելի քան 17 հազար դպրոցահասակներ ՀՀ կրթական համակարգում են, նրանց համար ապահովվում են նաև անհրաժեշտ դասագրքեր, գրենական պիտույքներ:
Անդրադառնալով ԼՂ-ից բռնի տեղահանված ուսանողներին՝ Ժաննա Անդրեասյանը նշեց, որ 2 800 ուսանողներ Հայաստանի բուհերում են իրենց կրթությունը շարունակում:
«Մենք ունենք ուսանողների խումբ, որոնք ԼՂ-ից էին, բայց հանդիսանում էին մեր ուսումնական հաստատությունների ուսանող, և նրանց ուսման վարձը վճարվում էր կամ ԼՂ իշխանությունների կամ իրենց ընտանիքների կողմից, որոնք նույնպես բռնի տեղահանվել էին: Այս խնդրով ևս աշխատանքներ տարվել են, այս ծրագրի շահառու է դարձել 900 մարդ, գումարները փոխանցվել է բուհերին, քոլեջներին, որպեսզի այս ուսանողների համար վճարումներ արվեն։ Մենք այս աշխատանքը շարունակելու ենք»,- եզրափակեց Անդրեասյանը:
Պատմություններ
