Հայաստանն ու Հունաստանը ռազմատեխնիկական համագործակցության համաձայնագիր են կնքել

Հայաստանն ու Հունաստանը ռազմատեխնիկական համագործակցության համաձայնագիր են կնքել, որը կուղարկվի խորհրդարան վավերացնելու համար։ Համապատասխան հարցն ընդգրկված է կառավարության մարտի 7-ի նիստի օրակարգում։

2018-ին Հայաստանը Հունաստանին առաջարկել է համաձայնագիր կնքել ռազմատեխնիկական համագործակցության հարցերով, իսկ 2023-ի դեկտեմբերի 14-ին այն ստորագրվել է Հայաստանի ու Հունաստանի պաշտպանության նախարարների միջև։ 

Համաձայնագրով սահմանվում են կողմերի միջև համագործակցության ուղղությունները, մասնավորապես՝ պաշտպանական կարողություններն ուժեղացնելու նպատակով նոր տեխնոլոգիաների և ռազմական նշանակության արտադրանքի հետազոտությունների խթանում, զարգացման և արտադրության ոլորտներում համագործակցություն՝ կողմերի ազգային օրենսդրություններին համապատասխան:

«Համաձայնագիրը ներառում է համագործակցության այնպիսի կարևորագույն  ոլորտներ, ինչպիսիք են՝ զենք, զինամթերք և պայթուցիկ նյութեր արտադրելու նպատակով տեխնոլոգիաների փոխանցում և տեխնիկական աջակցություն, զինամթերքի արտադրության ոլորտում տեղեկատվության և փորձի փոխանակում, ռազմական նշանակության ապրանքների և դրանց արտադրության ոլորտում հետազոտությունների իրականացում, դրանց արտադրության նպատակով համատեղ կազմակերպությունների հիմնում»,- նշված է որոշման հիմնավորումներում։ 

Համաձայնագիրն իրականացնելու և համագործակցությունը դյուրացնելու նպատակով նախատեսվում է ստեղծել հայ-հունական հանձնաժողով։ 

https://civilnet.am/news/766753/%d5%b0%d5%b8%d6%82%d5%b6%d5%a1%d5%bd%d5%bf%d5%a1%d5%b6%d5%ab-%d5%ba%d5%b6-%d5%b2%d5%a5%d5%af%d5%a1%d5%be%d5%a1%d6%80%d5%a8-%d5%b0%d5%b6%d5%a1%d6%80%d5%a1%d5%be%d5%b8%d6%80-%d5%a7-%d5%b0%d5%a1%d5%b4%d5%a1%d6%80%d5%b8%d6%82%d5%b4-%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%ab-%d6%86%d6%80%d5%a1%d5%b6%d5%bd%d5%ab%d5%a1%d5%b5%d5%ab-%d5%b0%d5%b6%d5%a4%d5%af%d5%a1%d5%bd%d5%bf%d5%a1%d5%b6%d5%ab-%d5%b0%d5%a5%d5%bf-%d6%84%d5%a1%d5%bc%d5%a1%d5%af%d5%b8%d5%b2%d5%b4-%d5%b0%d5%a1%d5%b4%d5%a1%d5%a3%d5%b8%d6%80%d5%ae%d5%a1%d5%af%d6%81%d5%b8%d6%82%d5%a9%d5%b5%d5%b8%d6%82%d5%b6%d5%a8/

Հունաստանի ազգային պաշտպանության նախարար Նիկոլաոս Դենդիասը մարտի 4-ին պաշտոնական այցով Երևանում էր։ Նա Հայաստանի պաշտպանության նախարարի հետ պայմանավորվել էր նոր լիցք հաղորդել ռազմատեխնիկական համագործակցությանը։