Այսօր Բրյուսելում կկայանա Փաշինյան-Բլինքեն-Ֆոն դեր Լայեն հանդիպումը

Վարչապետ Նիկոլ Փաշինյանն աշխատանքային այցով մեկնել է Բրյուսել: Այսօր՝ ապրիլի 5-ին, նախատեսված է Փաշինյանի, Եվրոպական հանձնաժողովի նախագահ Ուրսուլա ֆոն դեր Լեյենի և ԱՄՆ պետքարտուղար Էնթոնի Բլինքենի եռակողմ հանդիպումը:

Եռակողմ հանդիպումը նախատեսված է Երևանի ժամանակով 14:00-ին։

Բրյուսել այցի շրջանակում Նիկոլ Փաշինյանը հանդիպում կունենա նաև ԱՄՆ Միջազգային զարգացման գործակալության ղեկավար Սամանթա Փաուերի հետ:

***

ԱՄՆ Պետդեպարտամենտը, արձագանքելով Ադրբեջանից հնչող մտահոգություններին,  հայտարարել է, որ Փաշինյան-Բլինքեն-Ֆոն դեր Լայեն հանդիպմանը քննարկվելու է Հայաստանի բարեփոխումներին և ժողովրդավարությանը, տնտեսությանը վերաբերող հարցեր։ Ըստ Պետդեպի՝ հայ-ադրբեջանական խաղաղության գործընթացն այս հանդիպման օրակարգում չէ:

Ադրբեջանի արտգործնախարարությունը պնդել էր, թե Վաշինգտոնի և Բրյուսելի «հայամետ» կեցվածքը կարող է Հայաստանի մոտ թյուր պատկերացումներ ստեղծել, թե Եվրամիությունն ու Միացյալ Նահանգների կարող են նրան օգնել Ադրբեջանի դեմ պայքարում․ «Եթե Հայաստանը որևէ ապակայունացնող քայլի դիմի, Եվրամիությունն ու Միացյալ Նահանգները կկիսեն պատասխանատվությունը»։

ԱՄՆ պետքարտուղար Էնթոնի Բլինքենը ապրիլի 3-ին Ադրբեջանի նախագահ Իլհամ Ալիևի հետ հանդիպմանն ասել է, որ եռակողմ հանդիպումը ուղղված չէ Ադրբեջանի դեմ։ Ալիևն իր հերթին նշել է, որ ապրիլի 5-ին նախատեսված հանդիպումը կսրի լարվածությունը Հարավային Կովկասում և նոր բաժանարար գծեր կստեղծի՝ խաղաղություն հաստատելու փոխարեն:

Թուրքիան և Ռուսաստանը ևս մտահոգություն էին հայտնել ԵՄ-ԱՄՆ-Հայաստան եռակողմ հանդիպման առնչությամբ։ Ըստ Անկարայի՝ այն կխախտի չեզոքությունը, «որը պետք է հիմք ընդունվի տարածաշրջանում բարդ խնդիրների լուծման համար»։ Մոսկվան էլ կարծում, թե հանդիպման նպատակն իրեն Հարավային Կովկասի տարածաշրջանից դուրս մղելն է։