Civilnet
Այս գիշեր Իրանը ԱԹՍ-ներով, բալիստիկ և թևավոր հրթիռներով հարվածներ է հասցրել Իսրայելին, ինչը Մերձավոր Արևելքում կարող է հանգեցնել ռազմական նոր էսկալացիայի։ Ամերիկյան Stratfor հետազոտական կենտրոնը կանխատեսումներ է արել, թե ինչպիսին կարող է լինել Իսրայելի պատասխանը Իրանի հարվածներին։
Իսրայելի ռազմական պատասխանի տարբերակները ներառում են հարվածներ Իրանի դաշնակիցներին և պրոքսի ուժերին Լիբանանում, Սիրիայում, Իրաքում և Եմենում, ինչպես նաև թիրախներ հենց Իրանում:
Ըստ վերլուծական կենտրոնի՝ Իսրայելը հարվածներ կհասցնի՝ նպատակ ունենալով կանխել իր վրա իրանական ուղղակի հարձակումների կրկնությունը: Իսրայելի պատասխանը մասամբ պայմանավորված կլինի Իսրայելի կառավարության՝ Իրանի հետ բացահայտ առճակատման ռիսկի ընկալման այն աստիճանով, թե որքանով է ԱՄՆ-ն աջակցում իր պատասխան գործողություններին և ինչպիսին է Իրանի դեմ էսկալացիոն գործողությունների հանրային աջակցությունը:
Իսրայելը կարող է ինտենսիվ ավիահարվածներ հասցնել Իրանի պրոքսի ուժերին Լիբանանում, Սիրիայում և Իրաքում, որտեղ նախկինում բազմաթիվ հարձակումներ է իրականացրել՝ կենտրոնանալով Իսլամական հեղափոխության պահապանների կորպուսի օբյեկտների և պաշտոնյաների վրա։ Սա կարող է տարածվել նաև Իրանի դիվանագիտական կառույցների վրա, ինչպիսին ապրիլի 1-ին Դամասկոսում Իրանի դիվանագիատական ներկայացուցչությանը հասցված հարվածն էր:
Հարվածներ կարող է են հասցվել նաև Եմենի հութիներին և/կամ այնտեղ տեղակայված իրանցիներին, թեև նման հարվածները, ամենայն հավանականությամբ, կպահանջեն ԱՄՆ-ի աջակցությունը:
Իսրայելը կարող է դիտարկել նաև իր դեմ Իրանից արձակված հրթիռների տեղակայման վայրերին ու ենթակառուցվածքներին հարվածները, սակայն այդ գործողությունը բարդ է Իսրայելի ռազմաօդային ուժերի համար, դրա համար կպահանջվի ԱՄՆ աջակցությունը, և դա կարող է իրականացվել հարվածների մի քանի փուլով։
Ըստ Stratfor-ի՝ Իսրայելի գործողությունները կարող են նաև ներառել օդային հարվածներ Սիրիայում Իրանի օբյեկտներին կամ առանձին թիրախների։
Լիբանանում հարվածների թիրախ կարող են դառնալ ոչ միայն Հեզբոլլահը, այլև երկրի խորքում օբյեկտները։ Stratfor-ի վերլուծաբանները հնարավոր են համարում նաև սահմանափակ ցամաքային գործողությունները Լիբանանում։
Ըստ ամերիկյան վերլուծական կենտրոնի մասնագետների՝ Իսրայելի ռազմական տարբերակները սահմանափակվում են ոչ միայն օդային և անօդաչու թռչող սարքերի հզորությամբ, այլև նրա մշակած Jericho II և Jericho III բալիստիկ հրթիռների՝ պատերազմում կիրառած չլինելու հանգամանքով։ Jericho II և Jericho III բալիստիկ հրթիռները ստեղծվել են 1991-ի Ծոցի պատերազմի ժամանակ Իսրայելի վրա իրաքյան Scud հրթիռների հարձակումներին ի պատասխան: Իսրայելը դրանք երբևէ պատերազմական իրավիճակում չի կիրառել։
Ըստ Stratfor-ի՝ եթե Իսրայելը ուղղակիորեն հակադարձի Իրանին՝ ԱՄՆ-ի և այլ երկրների աջակցության մակարդակը էական կլինի որոշելու, թե արդյոք ճգնաժամը կծավալի Իսրայելից և Իրանից անդին:
Միացյալ Նահանգները, ամենայն հավանականությամբ, Իսրայելին կդրդի սահմանափակելու պատասխան գործողությունները՝ փորձելով զերծ մնալ ճգնաժամի սրացումից։ Իրանի տարածքում իսրայելական կործանիչների մասնակցությամբ պատասխան հարվածների համար կարող է հարկավոր լինել ԱՄՆ օդային աջակցությունը:
Պատմություններ
