Սեպտեմբերի 21-ին Հայաստանի պատմության թանգարանում կցուցադրվի Անահիտ աստվածուհու արձանի գլուխը

Այս տարվա սեպտեմբերի 21-ին Հայաստանի պատմության թանգարանում կցուցադրվեն Անահիտ աստվածուհու բրոնզե արձանի գլուխն ու ձեռքը։ Ցուցադրությունը տևելու է 6 ամիս։ Այդ մասին կառավարության հուլիսի 18-ի նիստի ժամանակ ասել է կրթության, գիտության, մշակույթի և սպորտի նախարար Ժաննա Անդրեասյանը։

Նրա խոսքով՝ ակնկալվում է, որ ցուցադրության վեց ամիսների ընթացքում թանգարանը կունենա նվազագույնը 300 000 այցելու։ ԿԳՄՍ նախարարությունն առաջարկում է 15,6 մլն դրամ ուղղել ցուցադրության հանրահռչակմանը։ 

«Այս աշնանը պլանավորում ենք Հայաստանի պատմության թանգարանում Բրիտանական թանգարանի հետ համատեղ ցուցադրություն բացել, որը շատ կարևոր նշանակություն է ունենալու թանգարանային ոլորտի և թանգարանի միջազգայնացման ուղղությամբ։ Նախորդ տարվանից այս ուղղությամբ աշխատանքներ ենք ձեռնարկել, որի արդյունքում 2024-ին պայմանագիր է ստորագրվել Բրիտանական թանգարանի հետ համատեղ «Մայր աստվածություն․ Անահիտից Մարիամ» ժամանակավոր ցուցադրությունը Պատմության թանգարանում իրականացնելու մասով։ Դրա շրջանակներում առաջին անգամ Բրիտանական թանգարանի մշտական ցուցադրության մեջ ներկայացված և Անահիտ աստվածուհուն վերագրվող հայտնի բրոնզե արձանից պահպանված գլուխն ու ձեռքը կցուցադրվի Հայաստանում»,- ասել է Ժաննա Անդրեասյանը։