Civilnet
Հայաստանի վարչապետ Նիկոլ Փաշինյանը երեքշաբթի օրը՝ սեպտեմբերի 24-ին, հանդիպելու է Թուրքիայի նախագահ Ռեջեփ Թայիփ Էրդողանին, այդ մասին հայտնում է CNN TÜRK -ը։
Թուրքական լրատվամիջոցի ամերիկյան թղթակից Յունուս Փաքսոյի փոխանցմամբ՝ Էրդողանը, ի թիվս այլ երկրների ղեկավարների, «Թուրքական տանը» հյուրընկալելու է Հայաատանի վարչապետին։ Լրագրողն իր մեկնաբանության մեջ նշել է, որ սեպտեմբերի 24-ի այդ հանդիպումը ամենակարևորներից է լինելու և կարող է ծառայել տարածաշրջանում լարվածության նվազեցմանը՝ բացելով նոր հեռանկարներ։
Էրդողանը հանդիպելու է նաև Իրանի, Ուկրաինայի նախագահներ Մասուդ Փեզեշքիանին ու Վոլոդիմիր Զելենզսկուն, ՄԱԿ-ի գլխավոր քարտուղար Անտոնիո Գուտերեշին և այլ անձանց։
Վարչապետ Նիկոլ Փաշինյանը սեպտեմբերի 22-27-ն աշխատանքային այցով մեկնել է Ամերիկայի Միացյալ Նահանգներ: Նյու Յորքում նա կմասնակցի ՄԱԿ-ի Գլխավոր ասամբլեայի 79-րդ նստաշրջանի աշխատանքներին, ելույթներ կունենա Ապագայի գագաթնաժողովում, ՄԱԿ ԳԱ 79-րդ նստաշրջանի բարձրաստիճան հատվածում:
Ըստ վարչապետի գրասենյակի տարածած հաղորդագրության՝ այցի ընթացքում վարչապետ Փաշինյանը հանդիպում կունենա ՄԱԿ-ի գլխավոր քարտուղար Անտոնիո Գուտերեշի հետ, նախատեսված են երկկողմ մի շարք հանդիպումներ տարբեր երկրների գործընկերների հետ:
Պատմություններ
