Մահացել է Ֆեթուլլահ Գյուլենը

ԱՄՆ-ում 83 տարեկանում մահացել է հայտնի գործիչ, Թուրքիայի նախագահ Ռեջեփ Թայիփ Էրդողանի քաղաքական հակառակորդ Ֆեթուլլահ Գյուլենը, հայտնում են թուրքական լրատվամիջոցները։

Թուրքական իշխանությունները Գյուլենին համարում էին Թուրքիայի թշնամի՝ նրան մեղադրելով 2016-ի հուլիսի 15-ի ռազմական հեղաշրջման փորձի մեջ։ Դրանից հետո թուրքական կողմը երկրի ներսում «պատերազմ էր» հայտարարել Գյուլենի հետևորդների՝ «գյուլենականների» դեմ։ 

Թուրք ազդեցիկ գործիչը 90-ականների վերջերից բնակվում էր ԱՄՆ-ի Փենսիլվանիա նահանգում։ Թուրքական իշխանությունները քանիցս դիմել են ԱՄՆ-ի ղեկավարությանը՝ նրան Թուրքիա արտահանձնելու պահանջով, սակայն մշտապես մերժում են ստացել։ Այդ հարցը ԱՄՆ-Թուրքիա հարաբերությունների ամենակնճռոտ հարցերից էր համարվում։

Ըստ թուրքական կողմի՝ աշխարհի տարբեր մասերում, հատկապես Եվրոպայում և ԱՄՆ-ում գործում են Ֆեթուլլահ Գյուլենի գաղափարախոսությանը հարող մի շարք դպրոցներ։