Թուրքիան ուշադիր հետևում է խաղաղության ուղղությամբ Ադրբեջանի և Հայաստանի ջանքերին․ Էրդողան

Թուրքիան ուշադիր հետևում է խաղաղության ուղղությամբ Ադրբեջանի և Հայաստանի գործադրած ջանքերին, հայտարարել է Թուրքիայի նախագահ Ռեջեփ Թայիփ Էրդողանը։

«Ուշադիր հետևում ենք այդ ուղղությամբ Ադրբեջանի և Հայաստանի գործադրած անկեղծ ջանքերին։ Ակնկալում ենք շատ լավ նորություններ ստանալ, քանի դեռ արտաքին ուժերը սաբոտաժի չեն ենթարկել գործընթացը։ Մենք ադրբեջանցի եղբայրների հետ կշարունակենք համակարգված ձևով աշխատել կայուն խաղաղության համար»,- Թուրքիայի կառավարության հոկտեմբերի 28-ի նիստից հետո ասել է Էրդողանը։

Ըստ նրա՝ «ներկայում տարածաշրջանում խաղաղության քամիներ են փչում»։

Էրդողանը տարածաշրջանային զարգացումների համատեքստում անդրադարձել է նաև 3+3 հարթակին՝ հիշեցնելով հոկտեմբերի 18-ին Թուրքիայի, Ռուսաստանի, Իրանի, Հայաստանի ու Ադրբեջանի արտգործնախարարների  մակարդակով անցկացված հանդիպումը։ Նա հայտարարել է հարթակն ինստիտուցիոնալ մակարդակի հասցնելու մտադրության մասին։