Civilnet
«Պատճառը, թե ինչու ես անձամբ ներկա չեմ COP29-ին, շատ պարզ է: Կլիմայական արդարության հիմնարար սկզբունքը, որը ես և բազմաթիվ այլ ակտիվիստներ կրում ենք, և որն իրականում մեր ակտիվիզմի հիմնասյունն է, ամբողջովին անհամատեղելի է Ադրբեջանում անցկացվող COP29-ի հետ». նոյեմբերի 14-ին Հայաստանի ամերիկյան համալսարանում միջոցառման ժամանակ հայտարարեց շվեդ բնապահպան-ակտիվիստ Գրետա Թունբերգը։ Միջոցառումը կրում էր «Ադրբեջանի ագրեսիայի ազդեցությունը մարդու իրավունքների ու շրջակա միջավայրի պաշտպանության վրա» խորագիրը։
«Ադրբեջանը, ինչպես նշեցին, ռեպրեսիվ պետություն է, նավթային երկիր, որը մտադիր է ընդլայնել հանածո վառելիքի արտադրությունը և պատասխանատու է էթնիկ զտումների համար: Դա, մեղմ ասած, գարշելի է: Ծայրաստիճան կեղծավորություն է այն, որ այս համաժողովը՝ COP29-ը, անցկացվում է այդ երկրում»,- հայտարարեց Թունբերգը։
Նա ընդգծեց՝ Ադրբեջանին հաջողվեց խուսափել գործած հանցագործությունների համար պատասխանատվությունից, ավելին՝ նրան տրամադրվեց համաշխարհային հարթակ՝ օրինականացնելու մարդու իրավունքների լրջագույն խախտումները և էթնիկ զտումները։
«Եվ աշխարհը լուռ է մնում և տալիս է նրանց այդ հնարավորությունը՝ նորից ու նորից։ Մինչ մենք խոսում ենք, քաղաքացիական հասարակության վրա շարունակական ճնշումներ են գործադրվում, և փոփոխությունների կոչ անող ձայները պարբերաբար լռեցվում և բանտարկվում են»,- նշեց ակտիվիստն ու կրկնեց՝ Ադրբեջանին հանցագործությունները կոծկելու հնարավորություն է տրվում։
Պատմություններ
