Civilnet
Ադրբեջանը կառավարության պաշտոնյայի մեղադրանք է առաջադրել ռազմական տեղեկություններ տարածելու համար՝ սահմանազատման գործընթացի շրջանակներում Հայաստանի կողմից Ադրբեջանին վերադարձված գյուղերում ռազմական դիրքերի լուսանկարներ անելու համար
Առողջապահության նախարարության Հանրային առողջության և բարեփոխումների կենտրոնի քաղաքացիական պաշտպանության շտաբի պետ Ադալաթ Վերդիևը ձերբակալվել է երկուշաբթի։
Նրան մեղադրանք է առաջադրվել պետական գաղտնիք հանդիսացող տեղեկություններ տարածելու և ծանր հետևանքներ առաջացրած պաշտոնեական լիազորությունները չարաշահելու համար։ Մեղավոր ճանաչվելու դեպքում նրան սպառնում է մինչև յոթ տարվա ազատազրկում։
Վերդիևը, որը նաև պահեստազորի սպա և ռազմական փորձագետ է, նոյեմբերի 22-ին մասնակցել է Պետական սահմանապահ ծառայության կողմից Ղազախում և Խեյրիմլիում կազմակերպված մամուլի շրջայցին։ Խեյրիմլին այն չորս գյուղերից մեկն էր, որոնք ապրիլին սահմանազատման գործընթացի շրջանակում Հայաստանը հանձնել է Ադրբեջանին։
Վերդիևը ձերբակալվել է Ֆեյսբուքում տեսանյութը հրապարակելուց երեք օր անց։
Գլխավոր դատախազությունը նրան մեղադրել է պետական գաղտնիք հանդիսացող ռազմական տեղեկություններ տարածելու մեջ, որ նա իբր նկարահանել է «զինված ուժերի մարտական դիրքերի բարձրությունները, սահմանապահ զորքերի տեղակայման վայրերը, կոորդինատները և մարտական իրավիճակը»։
«Կան հիմնարար կասկածներ, որ Ադալաթ Վերդիևը, օգտագործելով իր պաշտոնեական լիազորությունները, զգալի վնաս է հասցրել Ադրբեջանի Հանրապետության շահերին [...], ինչը հանգեցրել է ծանր հետևանքների»,- ասված է հայտարարությունում։
Չնայած նրա ձերբակալությանը՝ շրջայցին մասնակցած մի շարք այլ լրագրողներ ևս գյուղից նյութեր են հրապարակել, այդ թվում՝ Report-ը և APA-ն, որոնք կառավարամետ լրատվական գործակալություններ են։
Մեդիա իրավունքի փորձագետ Խալեդ Աղալին OC Media-ին ասել է, որ 2004-ին ընդունված Պետական գաղտնիքի մասին օրենքի որոշ դրույթներ, որոնց խախտման մեջ մեղադրվում է Վերդիևը, «կորցրել են իրենց արդիականությունը տեխնոլոգիական զարգացումների լույսի ներքո»։
«Եթե որևէ տեղակայման կամ վայրի մասին տեղեկությունները հեշտությամբ կարող են տեսնել և ուսումնասիրել բոլորը՝ օգտագործելով տեխնոլոգիաները, ապա այդ տեղեկությունների հավաքման և տարածման համար պատասխանատվություն սահմանելը անտրամաբանական է թվում»,- ասել է նա։
Պատմություններ
