Civilnet
Ադրբեջանի նախագահ Իլհամ Ալիևը հայտարարել է, որ Բաքուն նախատեսում է հետագայում ևս ռուսական զենք գնել, սակայն գործընթացը դադարեցվել է օբյեկտիվ պատճառներով:
«Այո, նախատեսում է (զենք գնել Ռուսաստանից - խմբ.)։ Բայց պետք է ասեմ, որ վերջին առնվազն երեք տարվա ընթացքում ռուսական զենքի գնման նոր պայմանագրեր չեն ստորագրվել»,- Россия сегодня-ի գլխավոր տնօրեն Դմիտրի Կիսելյովին տված հարցազրույցում ասել է նա։
Ալիևը նշել է, որ Ադրբեջանը գոհ է Ռուսաստանի հետ հարաբերությունների զարգացումից. «Մենք ուրախ ենք, թե ինչպես են զարգանում մեր հարաբերությունները։ Վստահ եմ, որ հաջորդ տարի ևս այդ դրական դինամիկան կպահպանվի։ Այսօր Ռուսաստանն ու Ադրբեջանը հուսալի գործընկերներ են, և կարծում եմ, որ դրանում կասկած չկա ոչ Ադրբեջանում, ոչ Ռուսաստանում։ Մեր երկրների համար դժվարին ժամանակներում մենք մեզ միշտ բարեկամաբար ենք պահել»։
Ադրբեջանի նախագահի խոսքով՝ Լեռնային Ղարաբաղի վերականգնման գործում Բաքուն սպասում է ռուսական ներդրումների: Նա հայտնել է, որ առաջին ներդրումային նախագիծն իրականացրել է Թաթարստանը։ Խոսքը Ջաբրայիլի շրջանում «ԿԱՄԱԶ»-ի սպասարկման կենտրոնի բացման մասին է։ «Սա առաջին ներդրումային նախագիծն էր, այսինքն՝ օտարերկրյա ներդրումների առաջին նախագիծը ռուսականն էր։ Այնպես որ, մենք և ներդրումների ենք սպասում, և ուրախ կլինենք կապալառուներին տեսնել»,- ասել է Ալիևը։
Պատմություններ
