Նոր կարգավորումներ՝ տնային կալանքի տակ գտնվող աշխատողների համար
Civilnet
Արդարադատության նախարարությունը առաջարկում է փոխել տնային կալանքի սահմանափակումները՝ թույլ տալով հեռավար աշխատանք։
Արդարադատության նախարարությունը ներկայացրել է օրենսդրական փոփոխություն, որը հնարավորություն կտա տնային կալանքի տակ գտնվող անձանց որոշ պայմաններում շարունակել հեռավար աշխատել։ Նախագիծը հաստատվել է կառավարության հունվարի 30-ի նիստին՝ չզեկուցվող հարցերի փաթեթում։
Նախարարությունն արձանագրել է, որ ներկայում աշխատողի լիազորությունները կասեցվում են, եթե նրա նկատմամբ կիրառվում է կալանք։ Սակայն տնային կալանքի դեպքում իրավական կարգավիճակը հստակեցված չէ․ պարզ չէ՝ կարող է արդյոք աշխատողը շարունակել իր պարտականությունների կատարումը, թե ոչ։
«Այսինքն, այս մասով աշխատանքային հարաբերությունների հետագա ընթացքին վերաբերող հարցերը մնում են օրենսդրորեն չկարգավորված»,- նշված է նախագծում։ Օրենքի այս անորոշությունը կառավարությունը նպատակ ունի վերանայել։
Ըստ նախագծի, այն դեպքերում, երբ դատարանի որոշմամբ մեղադրյալի նկատմամբ սահմանափակումներ չեն կիրառվում (օրինակ՝ հեռախոսազանգերի, նամակագրության կամ այլ հաղորդակցման արգելքներ), ապա անձը գործնականում կարող է իր բնակության վայրից կատարել իր աշխատանքային պարտականությունները, եթե աշխատանքի բնույթը թույլ է տալիս հեռավար աշխատել։
Ուստի, նախարարությունը առաջարկում է օրենսդրական փոփոխություն, որը թույլ կտա հստակ սահմանել տնային կալանքի տակ գտնվող աշխատողների կարգավիճակը և ապահովել նրանց աշխատանքային գործունեության շարունակականությունը, եթե դրա համար խոչընդոտներ չկան։
Գևորգ Թոսունյան
Թեմա
Պատմություններ
