Civilnet
Վրաստանի խորհրդարանը կողմ է քվեարկել 49 ընդդիմադիր պատգամավորների մանդատի վաղաժամկետ դադարեցմանը:
49 պատգամավորը «Կոալիցիա փոփոխությունների համար», «Միասնություն-Ազգային շարժում», «Ուժեղ Վրաստան» դաշինքների ներկայացուցիչներ են, որոնք տարեվերջին իրենց լիազորությունները դադարեցնելու դիմում էին ներկայացրել։
Կենտրոնական ընտրական հանձնաժողովի ամփոփիչ արձանագրության համաձայն՝ 2024 թվականի հոկտեմբերի 26-ի ընտրությունների արդյունքներով «Ուժեղ Վրաստանը» ստացել է 14 մանդատ, «Հանուն փոփոխությունների կոալիցիան»՝ 19, «Միասնություն-Ազգային շարժում»-ը՝ 16 մանդատ։
Ընդդիմության այդ պատգամավորները կեղծված են համարում 2024 թվականի հոկտեմբերի 26-ի խորհրդարանական ընտրությունները։
«Հանուն փոփոխության», «Ուժեղ Վրաստան» և «Միասնություն-Ազգային շարժում» դաշինքները դիմել էին ԿԸՀ՝ ցուցակները հետ կանչելու պահանջով։ «Գախարիան Վրաստանի համար» կուսակցությունը, որը նույնպես չի ճանաչում 11-րդ գումարման խորհրդարանը, միայն հայտարարությունների մակարդակով ընդգծել է, որ իրենք մտադիր չեն աշխատել այս օրենսդիր մարմնում։
Վրաստանի օրենսդիր մարմնում այժմ Սահմանադրությամբ ամրագրված 150 պատգամավորի փոխարեն 101 պատգամավոր է ներկայացված: Իշխող ուժը տիրապետում է 81 մանդատի, ընդդիմությունը՝ 20:
2024 թվականի նոյեմբերից Վրաստանում բողոքի ակցիաներ են անցկացվում նոր խորհրդարանական ընտրությունների պահանջով։
Պատմություններ
