Civilnet
Հայաստանն ակնկալում է Թուրքիայի հետ հարաբերությունների ամբողջական կարգավորում, որը կներառի դիվանագիտական հարաբերությունների հաստատում և Հայաստանի ցամաքային սահմանի ապաշրջափակում։ Այս մասին ասել է Հայաստան-Թուրքիա հարաբերությունների կարգավորման հարցով հատուկ բանագնաց Ռուբեն Ռուբինյանը՝ թուրքական «NTV» հեռուստաալիքի հետ զրույցում, փոխանցում է Ermenihaber-ը։
«Հայաստանն ամբողջովին պատրաստ է Թուրքիայի հետ հարաբերությունների կարգավորմանը, և այդ հարցում Հայաստանի մոտեցումը գործընթացի սկզբից մինչև այսօր չի փոխվել»,- ասել է նա։
Խոսելով կարգավորման գործընթացի մասին՝ Ռուբինյանը նշել է, որ Հայաստանը պատրաստ է հարաբերությունների կարգավորմանն առանց որևէ նախապայմանի։
Նա ասել է, որ Հայաստանը պատրաստ է Թուրքիայի հետ սահմանի բացմանը և սպասում է Թուրքիայի քայլին։ Ռուբինյանն ընդգծել է, որ հայկական կողմում Մարգարա անցակետը վերանորոգվել է, և նույնն ակնկալում են թուրք գործընկերներից։ Ռուբինյանի խոսքով՝ համաձայնություն է ձեռք բերվել վերանորոգելու կամ վերակառուցելու սահմանին գտնվող կամուրջը։
«Մինչև օրս ամենակարևոր պայմանավորվածությունը եղել է սահմանը երրորդ երկրների քաղաքացիների և դիվանագիտական անձնագիր ունեցողների համար բացելը, որը ձեռք է բերվել 2022-ին»- ասել է Ռուբինյանը։
Պատմություններ
