Civilnet
Հայաստանին մատակարարվող ավերիչ զենքն ուղղված է մեր դեմ, հայտարարել է Ադրբեջանի նախագահ Իլհամ Ալիևը Բաքվի 12-րդ բլոբալ ֆորումի բացմանը, հաղորդում են ադրբեջանական լրատավմիջոցները։
«Հնարավոր է, որ այսօր դրանք [զենքերը] պահանջվում են այլ տեղ, սակայն այդ զենքն ուղարկվում է Հայաստան»,- ասել է նա:
Նա քննադատել է Հայաստանում տեղակայված ԵՄ դիտորդական առաքելությանը՝ նշելով, որ այն իրականում «ԵՄ հետախուզական առաքելություն է». «Նրանք գիշեր-ցերեկ կանգնած են մեր սահմաններին, լրտեսների պես դիտարկելով հարմար ճեղքեր՝ մեզ մոտ թափանցելու համար: Մեր տրամադրության տակ կան նաև բավարար հետախուզական տվյալներ այդպիսի ընտրողական դիտորդական առաքելության մասին»:
Ալիևը քննադատել է նաև ԱՄՆ նախկին պետքարտուղար Էնթոնի Բլինքենին, որը պաշտոնավարման ժամանակ ակտիվ ներգրավվածություն ուներ Հայաստան-Ադրբեջան հարաբերություններում:
«Բլինքենի քաղաքականությունը փաստացի զրոյացրել է ամերիկա-ադրբեջանական հարաբերությունները: Մենք այդ հարաբերությունները կառուցել ենք տասնամյակների ընթացքում: Մենք եղել ենք ԱՄՆ-ի հուսալի և մոտ գործընկեր, և նրանք եղել են մեզ հետ: Իսկ երբ նրանք մեր կարիքը ունեին, մենք նրանց կողքին էինք՝ երբ խոսքը Իրաքի մասին էր, երբ խոսքը Աֆղանստանի մասին էր... ՆԱՏՕ-ի անդամ չլինելով՝ Ադրբեջանը 2001-ին միացավ Աֆղանստանում գործողություններին: Հենց մեր [զորակազմն] էր, որ վերջինը լքեց այդ երկիրը», - ասել է Ալիևը: «Սակայն մեր հեռանալուց հետո մեր դեմ պատժամիջոցներ կիրառվեցին, և դա մեծ հիասթափություն առաջացրեց Ադրբեջանում»,- ասել է նա:
Ալիևն ասել է, որ երբեմն խաղաղության հասնելու և արդարությունը վերականգնելու համար հարկավոր է ուժ կիրառել. «Այսօր մենք տեսնում ենք, թե ինչպես է Եվրամիությունը փոխում իր քաղաքականությունը՝ նպատակ ունենալով մեծացնել ռազմական ներուժը: Մենք տեսնում ենք, որ որոշ երկրներ ռեսուրսներ են ծախսում սեփական ռազմական ներուժի և ենթակառուցվածքների ամրապնդման համար: Մենք դրանով զբաղվում ենք արդեն առնվազն 20 տարի՝ 2005-ից: Այդ ժամանակից ի վեր մենք ստեղծել ենք հզոր բանակ: Այդ բանակն ազատագրել է մեր տարածքները, վերջ է դրել անջատողականությանը, և դրանով մեր երկրի տարածքային ամբողջականությունն ու ինքնիշխանությունը լիովին վերականգնվել են»:
Ալիևը նշել է, թե Ադրբեջանը խաղաղության է ձգտում. «Մենք պետք է հաստատենք խաղաղություն Հարավային Կովկասում: Ադրբեջանը հավատարիմ է խաղաղ գործընթացին և, ըստ էության, խաղաղության համաձայնագրի հեղինակն է»: Նրա խոսքով՝ ներկայումս քննարկվում է Հայաստանի և Ադրբեջանի միջև խաղաղության պայմանագիրը, որի կետերի մեծ մասն արդեն համաձայնեցված է:
Պատմություններ
