Զելենսկին և Թրամփը վերսկսում են երկխոսությունը․ նախագահները համաձայնության են եկել

ԱՄՆ-ի և Ուկրաինայի նախագահները Սպիտակ տանը բուռն քննարկումից 19 օր անց հեռախոսազրույց են ունեցել։ Վլադիմիր Զելենսկին և Դոնալդ Թրամփը «դրական և անկեղծ» են գնահատել մոտ մեկ ժամ տևած խոսակցությունը։ Այս մասին հայտնում է CNN-ը։

Հեռախոսազրույցը տեղի է ունեցել Թրամփ-Պուտին հեռախոսային բանակցությունից հետո։

Վլադիմիր Զելենսկին զանգից հետո հայտարարել է, որ շնորհակալ է   Թրամփին՝ «աշխատանքի լավ և արդյունավետ սկզբի համար»։

«Մենք հավատում ենք, որ Ամերիկայի, նախագահ Թրամփի և ամերիկյան ղեկավարության հետ հնարավոր է կայուն խաղաղություն հաստատել այս տարի», - ասել է Զելենսկին։

Ուկրաինայի նախագահը պատրաստակամություն է հայտնել դադարեցնել հարվածները Ռուսաստանի էներգետիկ և այլ քաղաքացիական ենթակառուցվածքների վրա։

ԱՄՆ նախագահն էլ իր Truth Social հարթակում հայտարարել է, որ Զելենսկու հետ քննարկման մեծ մասը հիմնված է եղել Պուտինի հետ զրույցի վրա՝ Ռուսաստանի և Ուկրաինայի պահանջներն ու կարիքները համաձայնեցնելու համար:

«Մենք ճիշտ ճանապարհի վրա ենք», - գրել է ԱՄՆ նախագահը:

Թրամփի վարչակազմը մերժել է զինադադարի համաձայնագրի դիմաց անվտանգության երաշխիքներ տրամադրելու Ուկրաինայի պահանջները։