Civilnet
Ադրբեջանի նախապայմաններին զուգահեռ պետք է շարունակել աշխատել, բանակցել, գտնել փոխադարձ ընդունելի, արժանապատիվ և երկարատև խաղաղություն ապահովող լուծումներ, այլընտրանք ուղղակի չկա, հայտարարել է ՀՀ ԱԳ նախարար Արարատ Միրզոյանը՝ մարտի 25-ին Իրանի ԱԳ նախարար Աբբաս Արաղչիի հետ Երևանում համատեղ մամուլի ասուլիսի ժամանակ։
Անդրադառնալով հարցին, թե Ադրբեջանի հետ եղե՞լ են խորհրդակցություններ խաղաղության համաձայնագրի համաձայնեցված տեքստի ստորագրման վերաբերյալ, Միրզոյանը նշել է՝ «Բաքվից պատրաստակամություն չկա»։
«Պաշտոնական Երևանն առաջարկել է սկսել խորհրդակցություններ՝ որոշելու համաձայնագրի ստորագրման տեղը, ժամը և մյուս մանրամասները։ Այս պահին մենք նույն պատրաստակամությունը պաշտոնական Բաքվից չենք լսել։ Այս պահին չկա ըմբռնում, թե որտեղ և երբ պետք է ստորագրվի։ Մենք պատրաստ ենք հնարավորինս արագ ներգրավվել այդ գործընթացում և դնել մեր ստորագրությունը»,- ասել է ՀՀ ԱԳ նախարարը։
Մարտի 13-ին Հայաստանն ու Ադրբեջանը հայտարարեցին, որ ավարտել են խաղաղության պայմանագրի տեքստի շուրջ աշխատանքները՝ եզրափակելով տևական ժամանակ բաց մնացած երկու հարցի վերաբերյալ քննարկումները։ Դրանք վերաբերում էին սահմանից երրորդ ուժերի դուրս բերմանն ու փոխադարձության սկզբունքով միջազգային հայցերի հետկանչին։
Չնայած խաղաղության համաձայնագրի տեքստի շուրջ բանակցությունների ավարտին, Բաքուն դեռ պնդում է, որ «փաստաթուղթը ստորագրելու համար անհրաժեշտ է համապատասխան փոփոխություններ մտցնել Հայաստանի սահմանադրության մեջ՝ Ադրբեջանի նկատմամբ տարածքային հավակնությունները վերացնելու նպատակով»։
Պատմություններ
