Ռուբիոն հայցել է Թուրքիայի աջակցությունը՝ Հարավային Կովկասում խաղաղության հասնելու գործում

ԱՄՆ պետքարտուղար Մարկո Ռուբիոն և Թուրքիայի արտաքին գործերի նախարար Հաքան Ֆիդանը Վաշինգտոնում քննարկել են խաղաղությունը Հարավային Կովկասում։ Պետքարտուղարության հաղորդագրությունը՝ թարգմանաբար ստորև։

«Պետքարտուղար Մարկո Ռուբիոն հանդիպել է Թուրքիայի ԱԳ նախարար Հաքան Ֆիդանին՝ քննարկելու անվտանգությանն ու առևտրին առնչվող առանցքային հարցեր։ Պետքարտուղարը հայցել է Թուրքիայի աջակցությունը՝ Ուկրաինայում և Հարավային Կովկասում խաղաղության հասնելու գործում։

Նա գնահատել է Թուրքիայի առաջնորդությունը «Իսլամական պետության» դեմ գլոբալ կոալիցիայում և վերահաստատել է սերտ համագործակցության անհրաժեշտությունը՝ հանուն կայուն, միավորված և խաղաղ Սիրիայի, որը ո՛չ միջազգային ահաբեկչության հենակետ է, ո՛չ էլ՝ իրանական ապակայունացնող գործողությունների հարթակ»։

Մարտի 25-ին Հաքան Ֆիդանը երկօրյա այցով մեկնել է Վաշինգտոն։ Ըստ Reuters-ի աղբյուրների՝ Ռուբիոյի այցի օրակարգային գլխավոր հարցը Թուրքիայի դեմ ամերիկյան պատժամիջոցների վերացումն է՝ F-16 կործանիչների վաճառքը վերսկսելու նպատակով։