Մովսես Հակոբյանին ու ևս մեկ գեներալի մեղադրանք է առաջադրվել

Դատախազությունը հայց է ներկայացրել ՀՀ զինված ուժերի գլխավոր շտաբի նախկին պետ, գեներալ-գնդապետ Մովսես Հակոբյանի և ՀՀ զինված ուժերի հրթիռային զորքերի և հրետանու վարչության նախկին պետ, գեներալ-մայոր Արմեն Հարությունյանի նկատմամբ։ Նրաքն մեղադրվում են պաշտոնեական անփութության մեջ։ Դատախազությունը պահանջում է նրանցից հօգուտ պետության բռնագանձել 4,5 մլրդ դրամ։ 

Ըստ մեղադրանքի՝ ինը տարի առաջ Ռուսաստանից Հայաստան է մատակարարվել 4,3 մլրդ դրամի ռազմական տեխնիկա, որը անպիտան է եղել։

Փաստինֆոն ավելի վաղ հայտնել էր, որ մեղադրանքի համաձայն՝ Արմեն Հարությունյանը, 2017-ի մայիսից պաշտոնավարելով որպես հրթիռային զորքերի և հրետանու պետ-վարչության պետ, խախտել է զինված ուժերի ներքին ծառայության կանոնագրքի պահանջները։ Նա իր պարտականությունների նկատմամբ անբարեխիղճ վերաբերմունք է ցուցաբերել և դրանք ոչ պատշաճ կատարել, ինչն անզգուշությամբ հանգեցրել է ծանր հետևանքների։

Մովսես Հակոբյանը մեղադրվում է նրանում, որ 2015-2016-ին, զբաղեցնելով պաշտպանության նախարարի տեղակալ-նյութատեխնիկական ապահովման դեպարտամենտի պետի պաշտոնը, ծառայության նկատմամբ անփույթ մոտեցման պատճառով պատշաճ չի կատարել իր պարտականությունները, ինչը հանգեցրել է առանձնապես խոշոր չափերի գույքային վնասի։

Երկու գեներալների նկատմամբ որպես խափանման միջոց կիրառվել է բացակայելու արգելք, իսկ Հակոբյանի դեպքում՝ նաև 10 մլն դրամի չափով գրավ։ 

Դատական տեղեկատվական «Դատալեքս» համակարգում առկա տվյալների համաձայն՝ այս գործով է ներկայացվել հայցը՝ պետությանը պատճառված վնասի փոխհատուցման մասին։