«Նուբարաշեն»-ի ազատազրկվածները մարմնական վնասվածքներ ունեն․ ՄԻՊ
Civilnet
Մարդու իրավունքների պաշտպանի աշխատակազմի ներկայացուցիչներն արձանագրել են, որ «Նուբարաշեն» քրեակատարողական հիմնարկի բանտարկյալները մարմնական վնասվածքներ ունեն։ Երեկ՝ մարտի 3-ին, մամուլում տեղեկություններ տարածվեցին, որ «Նուբարաշեն» քրեակատարողական հիմնարկում դիմակներով անձինք ծեծի են ենթարկել ցմահ դատապարտյալներին։
Քրեակատարողական ծառայությունը հաստատել էր բռնության մասին տեղեկությունը, պարզաբանելով, որ կալանավորված անձինք և ցմահ դատապարտյալներ դրսևորել են անհնազանդություն, վնասել են խցերի գույքը, այրել ներքնակները, հարվածել դռներին և այլն։ Այս ամենը կանխելու համար ծառայության հատուկ նշանակության բաժնի ծառայողները ֆիզիկական ուժի գործադրմամբ բանտարկյալներին դուրս են բերել խցերից, իսկ խցերում իրականացրել են խուզարկություններ։
Մարդու իրավունքների պաշտպանի հանձնարարությամբ «Նուբարաշեն» քրեակատարողական հիմնարկ է մեկնել արագ արձագանքման խումբ։
Պաշտպանի գրասենյակից հայտնում են, որ առանձնազրույցների ընթացքում ազատությունից զրկված անձանցից ոմանք Պաշտպանի ներկայացուցիչներին տեղեկություններ են ներկայացրել նույն օրը քրեակատարողական ծառայության հատուկ նշանակության բաժնի ծառայողների կողմից գործադրված, իրենց պնդմամբ, անհամաչափ ֆիզիկական ուժի, խցերում առկա գույքը կոտրելու, իրենց նկատմամբ վիրավորանքներ և հայհոյանքներ հնչեցնելու մասին:
«Ազատությունից զրկված անձինք պնդել են, որ այրվել են ոչ թե խցերի ներքնակները, այլ մեկ սրբիչ:
Արձանագրվել է նաև, որ ազատությունից զրկված անձանց ցուցաբերվում է բժշկական օգնություն, այդ թվում՝ 2 անձի մոտ առկա վնասվածքների կասկածի կապակցությամբ կատարվել է նաև ռենտգեն հետազոտություն»,- հայտնել են ՄԻՊ գրասենյակից:
Պատմություններ
