Ռուսաստանը պատրաստ է վերականգնել դիվանագիտական ​​հարաբերությունները Վրաստանի հետ․ Գալուզին

Մենք պատրաստ ենք վերականգնել դիվանագիտական ​​հարաբերությունները Վրաստանի հետ: Այս մասին հայտարարել է ՌԴ ԱԳ փոխնախարար Միխայիլ Գալուզինը՝  «Իզվեստիայի» հետ զրույցում։

«Մենք պատրաստ ենք գնալ այնքան հեռու, որքան պատրաստ է վրացական կողմը։ Այստեղ մեզ համար սահմանափակումներ չկան»,- ասել է Գալուզինը։  

Անդրադառնալով երկու երկրների միջև դիվանագիտական հարաբերությունների խզման պատճառներին, Գալուզինն ասել է, որ հարաբերությունները խզվել են Սաակաշվիլիի ռեժիմի կողմից (Սաակաշվիլին Վրաստանի նախագահն էր 2008–2013-ին)։ 

«Ցավում ենք, որ Վրաստանի ղեկավարությունը շարունակում է դիվանագիտական ​​հարաբերությունների վերականգնումը կապել Աբխազիայի և Հարավային Օսիայի վերաբերյալ մեր դիրքորոշման հետ»,- ասել է Գալուզինը։  

Ռուսաստանի դիվանագիտական պաշտոնյան վերահաստատել է պաշտոնական Մոսկվայի դիրքորոշումը, որ «2008-ի օգոստոսին ընդունված Աբխազիայի և Հարավային Օսիայի ինքնիշխանությունն ու անկախությունը ճանաչելու Ռուսաստանի Դաշնության որոշումը վերանայման ենթակա չէ»։