Թրամփը հրաժարվել է ռուս-ուկրաինական բանակցություններից հեռանալու ժամկետ նշել
Civilnet
ԱՄՆ նախագահ Դոնալդ Թրամփը հրաժարվել է ռուս-ուկրաինական բանակցություններից հեռանալու կոնկրետ ժամկետ նշել՝ հույս հայտնելով, որ պետք չի լինի այդպես վարվել։ Այս մասին գրում է CNN-ը։
Ավելի վաղ՝ ապրիլի 18-ին, Փարիզում եվրոպացի և ուկրաինացի պաշտոնյաների հետ հանդիպումներից հետո ԱՄՆ պետքարտուղար Մարկո Ռուբիոն հայտարարել է, որ, եթե հնարավոր չէ ավարտել պատերազմն Ուկրաինայում, Միացյալ Նահանգները «պետք է հրաժարվի իր ջանքերից և շարժվի առաջ»: Թրամփը նույն օրը՝ Օվալաձև գրասենյակում լրագրողների հետ զրույցում ասել է, որ Ռուբիոն «ճիշտ է», բայց ԱՄՆ-ի՝ բանակցություններից հեռանալու ժամկետի վերաբերյալ հարցին ի պատասխան՝ հավելել է, որ ոչ մի կոնկրետ օրերի թիվ չի կարող նշել․
«Բայց մենք ուզում ենք այն (խմբ․՝ պատերազմը) արագ ավարտին հասցնել։ Եթե ինչ-որ պատճառով կողմերից մեկը շատ դժվարացնի, մենք պարզապես ասելու ենք՝ «դուք հիմար եք, դուք սարսափելի մարդիկ եք», և մենք պարզապես հրաժարվելու ենք, բայց հուսով եմ, որ մեզ պետք չի լինի այդպես վարվել»,- ասել է Թրամփը:
Նա հրաժարվել է ասել, թե արդյո՞ք պատրաստ է լիովին հրաժարվել բանակցություններից, կամ արդյո՞ք նա կաջակցի Ուկրաինային ռազմական առումով, եթե բանակցությունները ձախողվեն: Բանակցությունները շարունակելու համար անհրաժեշտ առաջընթացի մասին հարցին ի պատասխան՝ Թրամփն ասել է, որ ինքը «պետք է տեսնի այն ավարտելու ցանկություն երկու կողմից էլ»՝ կանխատեսելով, որ դրա մասին կիմանա «շուտով»:
«Կարծում եմ, որ մենք իսկապես լավ հնարավորություն ունենք այն ավարտելու: Դա հասնում է գագաթնակետին հենց հիմա»,- ասել է Թրամփը:
Պատմություններ
