Շտապօգնության բրիգադի վրա հարձակվել են. վնասվել է վարորդը

Առողջապահության նախարար Անահիտ Ավանեսյանը հայտնում է, որ մասնագիտական պարտականությունները կատարելու ընթացքում հարձակման է ենթարկվել շտապօգնության Աշտարակի բրիգադը։ Կանչի վայրում դանակով զինված քաղաքացի է հարձակվել բուժաշխատողների վրա, ինչի հետևանքով տուժել է շտապօգնության մեքենայի վարորդը։

Դեպքի առթիվ հաղորդում է ներկայացվել ոստիկանություն։ Նախարարի խոսքով՝ գերատեսչությունը գնում է խնդրի լուծման իրավակարգավորման ճանապարհով:

«ԱԺ պատգամավորների նախաձեռնությամբ բուժաշխատողների նկատմամբ բռնության քրեականացման հարցն է քննարկվում: Նաև նախաձեռնելու եմ քննարկման դնել շտապօգնության բրիգադների անհատական պաշտպանության միջոցներ ներդնելու հարցը»,- հայտարարել է Ավանեսյանը։