Հայաստանից ԵՄ-ին անդամակցելու հայտ չենք ստացել․ Մարտա Կոս

Հայաստանը ԵՄ-ին անդամակցելու հայտ դեռ չի ուղարկել։ Այս մասին «Ազատությանը» ասել է դաշինքի ընդլայնման հարցերով հանձնակատար Մարտա Կոսը։

«Մենք դեռ Հայաստանի կողմից Եվրամիությանն անդամակցելու հայտ չենք ստացել, երբ ստանանք, կքննարկենք»,- ասել է Կոսը։

Նա չի հստակեցրել, արդյոք դիմումը ստանալու դեպքում Բրյուսելը հավանություն կտա, թե ոչ։ եվրոպացի բարձրաստիճան դիվանագետը միայն ընդգծել է՝ Երևանում հնչող այդ ցանկությունը ցույց է տալիս, թե որքան գրավիչ է այսօր եվրոպական ընտանիքը։

«Այն, ինչ տեղի ունեցավ Հայաստանի խորհրդարանում, ցույց է տալիս, որ Եվրամիության գրավչությունը հիմա ավելի բարձր է, քան նախկինում։ Ցանկացած երկրի համար Եվրամիության անդամակցությանը դիմելու համար երկու պայման կա՝ այն պետք է լինի պետություն և լինի Եվրոպայում։ Մենք Հայաստանից դիմում դեռ չենք ստացել, երբ ստանանք, կքննարկենք, բայց, ինչպես ասացի, սա ցույց է տալիս, որ մենք հետաքրքիր ենք բազմաթիվ երկրների համար», - նշել է Մարտա Կոսը։