Մերձավանի դպրոցը կգտնվի հատուկ մշտադիտարկման ներքո․ԿԳՄՍՆ

ՀՀ կրթության, գիտության, մշակույթի և սպորտի նախարարությունը խստորեն դատապարտում է Արմավիրի մարզի Փարաքար համայնքի Մերձավան գյուղի միջնակարգ դպրոցում տեղի ունեցած միջադեպը, որի ընթացքում պատմության ուսուցչի նկատմամբ դրսևորվել է անթույլատրելի վերաբերմունք՝ դպրոցի տնօրենի ժամանակավոր պաշտոնակատարի, որոշ ուսուցիչների, աշակերտների և ծնողների մասնակցությամբ։

Նախարարությունից տեղեկացնում են, որ Արմավիրի մարզպետի աշխատակազմի հետ համագործակցությամբ որոշում է կայացվել սահմանված կարգով տնօրենի ժամանակավոր պաշտոնակատարին աշխատանքից ազատելու և տնօրենի նոր ժամանակավոր պաշտոնակատար նշանակելու վերաբերյալ։

Ավելին՝ նախարարությունը կձեռնարկի բոլոր անհրաժեշտ քայլերը, այդ թվում՝ օրենսդրական, ուսումնական հաստատություններում ուսուցիչների իրավունքների պաշտպանությունն ապահովելու և կրթական միջավայրում առողջ, հարգալից ու անվտանգ պայմաններ ստեղծելու համար։

Մերձավանի միջնակարգ դպրոցը կգտնվի հատուկ մշտադիտարկման ներքո՝ առկա բոլոր խնդիրներն ուսումնասիրելու և անհրաժեշտ քայլեր ձեռնարկելու նպատակով, քանի որ արձանագրված միջադեպը վկայում է դպրոցում արմատացած խորքային և բազմաշերտ խնդիրների մասին։

Երեկ համացանցում տեսանյութեր էր տարածվել, որտեղ երևում է, թե ինչպես են մի խումբ ծնողներ և աշակերտներ հավաքվել Մերձավանի միջնակարգ դպրոցի միջանցքում և բարձր տոնայնությամբ մեղադրանքներ հնչեցնում ուսուցչի հասցեին, ով տեսախցիկների առաջ կանգնած փորձում է պարզաբանումներ տալ։ Տարածվող տեսանյութերում լսվում է, որ ծնողներն ու աշակերտները վարկաբեկող և վիրավորական արտահայտություններ են հնչեցնում ուսուցչի հասցեին։

Ծնողները դժգոհում են ուսուցչին, ասելով, թե նա թուրքերին սիրելու քարոզչություն է անում պատմության դասերի ընթացքում, անպատվում է աշակերտներին։